OSHAKATI- Ovashingi veetaxi ova ninga oihakanwa yokudengwa nokunyekwa eetuwa davo kolyamupombo ve li ninga ovatwalelwa.
Moshiningwanima oshitivali sha holoka po moule woshivike shimwe, omulumenhu weedula 25 okwa dengwa nokunyekwa otuwa yaye kokalyamupombo ve li ninga vovatwalelwa mOshakati Etitatu efimbo loufiku.
Omupopiliko wopolifi moshitukulwa shaShana Chief Inspector Thomas Aiyambo okwa hokolola ta ti nakuninga oshihakanwa okwa lefwa kovalumenhu vavali tava ti ova uka koshitaashi shomahooli kOkatana.
Omulumenhu ou motuwa okwa hangikamo nomutwalelwa womukainhu.
Ota ku hokololwa kutya eshi ovalumenhu va fika pOkatana ova kufa mo eendjebo neembele nokudenge omushingi moshipala.
Omukainhu ou a hangika motuwa okwa faduka po novafekelwa ova faduka po notuwa yaye, ashike oya ka monika konima yefimbo eshi oshiwana sha longela kumwe nopolifi okuyandja ouyelele.
Otuwa oya hangika kolukanda Uupindi mOshakati. Ovafekelwa ina va monika nomakonakono opolifi otaa twikile.
Mexuliloshivike ladjako, okwa lopotwa omulumenhu weedula 26 a ponokelwa ndele ta dengwa nokunyekwa otuwa yaye momukalo wafaafana naao mOndangwa.
Otuwa yaye oToyata Passo yonomola N34605ND, ina oluvala limbulau ina i monika fiyo onena.
Ota ku hokololwa kutya otuwa oya uka kombinga yaShikango lwokeengamba.
Opolifi oya kumaida ovashingi veeTaxi opo va kale va kotoka ngeenge tava twalele ovanhu molwashi ovatwalelwa vopaife ove li ninga ookalyamupombo.