Ouministeli woukashikekookanhu owa unganeka omutumba mutitatu wovalumenhu moNamibia, tau ka kala ko mo23 Novemba 2023 koSchutzenhuas Hotel mo//Karas.
Omupopiliko wouministeli Lukas Haufiku okwa ti otashi pepelele omauluvi ovalumenhu vahapu, oshoyo okufinda nokudengelea pedu odino molwoukwatya wonhumba.
“Eenghundafana da yeuluka otadi vatele yoo ovalumenhu vahapu okukala va manguluka okuyandja oyeetifi yomalimangeleko, osho yo okueta po ekandulepo loshimbide eshi,” Haufiku ta ti.
Omuwiliki womutumba Fillemon Amoongo, voo vawe tava ti Dj Munene okwa ti neudo omutumba wavo otau ka kala u li koshi yoshipalanyole shoyeetifi nekandulepo lomalimangeleko ovalumenhu moshilongo.
Amoongo okwa ti ova didilika omwaalu wovalumenhu vahapu moshilongo tave limangeleke, nowa didilikwa u li peelesenda o82 omoshilongo.
Okwa twi oyeetifi ihapu yomalimangeleko unene ovalumenhu hava kala ve na ondwanga yomaupyakadi, ashike ohava kala ashike tava pile melimweneneno.
Ovalumenhu vahapu vati ova ninga yoo oihakanwa yokufula oukonda noinima yeendilo, oyo ihapu yomuyo hai kala i li meendjo dihapu.
“Efimbo limwe omunhu oto hange e na etuwa londilo, eumbo londilo nomaliko akwao a wedwa po oimaliwa yondilo, nelalakano lokufuula oukadona.
Konima yefiku eshi oinima aishe ei tai ka nanwa, omunhu iha fyaala po nande oyo nofilinga.
Kexulilo lefiku omunhu shama a mono e li meendjo onduba ngaho, opo e shi holeke ohe ke limangeleka ashike,” Amoongo ta tumbula.
Okwa ti okwa hala yoo va done mo omhepo i li movalumenhu yokuninga oinima shaashi vati ova tila okuulwa omavaya.
Fimbo limwe vati omunhu oha holoke nande osheshi ha ningi opo a dule okumona omboloto yaye, yee shima a ka monika kutya oha ningi shike, yee e shi fya ohoni, vati ediladilo eli ha kala e na okulimangeleka ashike.
Oinima ei oyo twa hala okudenga mo moNamibia opo tu kale tu na oshilongo shi na ovalumenhu.
Okwa ti okwe lineekela omukalo ou ta ka vatela yoo ounona vahapu hava fiwapo vanini onga eefiye oshoyo oomeme hava fiwa nondwanga younona vehe wete eshi tave va ningi, loo efimbo limwe ovashamane ovo hava kala omitwe domaumbo, oshoyo ovanyangadali.
Amoongo okwa ti omutumba wovalumenhu natango otau ka kala yoo kOndangwa mo 1 Desemba 2023, monhele yomauliko opaipindi aNdangwa.
Ovakufimbinga mokuvatela omutumba woludi eli o-MVA fund, Autohaus Windhoek, Esh-Ham Business Consultants, Radio Energy noStadio Namibia.