Kae Maṱunḓu-Tjiparuro
Ohinondjiririsa yohoromende oyo ndji raisa okuhina ondengero, tjinene kovanane vombazu otjiṋa otjikuru tjopevapayuva tji tji kara povitjitwa avihe vyohoromende.
Ozombara tjiva maze tja nao kombunda yomambo nga ingana mehi tjinene motjiwaṋa tjOndjambo nu tjinene mOrukondwa rwa Hangwena mu mwa tura Ombara yOvakwanyama, Martha Mwadinomho Kristian Nelumbu, wOuhonapare wOmbazu wOvakwanyama. Ominista yOkehi yOngaro pOkati kOmahi nOmaunguriro waKumwe, Jennely Matundu, Omandaha wa ningirire ondjesiro morutuu kozombuze.
“Ouhumandu omahaameno kanga tjitire kutja Tjikukae Mwadinomho ma haame kotjihavero tjoparastika, tji tji he ri tjovanaviṱo vyokombanda otja tji pe kara povitjitwa. Oumba mbwi ouhazerwa wa yetere eyeye mokati kovaṱisiwa voruhoze notjiwaṋa tja kauriri tji tja kongorere ombakero moviraise pekepeke,” Matundu wa tjere nao morutuu rwe kotupa twozombuze Omandaha. Na tja otjiṋa hi ohoromende ya toora nokuhina enyando nu oministeri mai tara mo.
Posi ya nandarire mondjesiro tjiva mouhonapare wOvakwanyama mave munu kutja ondjesiro ya sere kombanda mohoromende nu wina kai sere kutja ya ningirirwa morupanda. Nungwari ohoromende mai sokutja ya hindi omundu wokombanda okukaningira ondjesiro kOmbara.
“Oṋa ndjo tu hara okurora okurwisa. Movitjitwa avihe vyohoromende ondumbiro nomayakuriro uriri ozombara kutja ze ri pi poo ze tuwa pi kaze mo kaparukaze uriri,” Ombara Tjinaaṋi Maharero ma tja nao. Na yandja nandarire otjisasanekero tjombakero katjisupi yomuhonge omunene Peter Katikisa Tjijombo pu pa ri ozombara pekepeke nungwari nḓa ri osangu uriri nokuhina oruveze ndu za kwizikirwa pu za sere kutja za haamisirwe. Ovo pu va ri kongotwe ovandu voporotika ava tuwa komurungu.
Tjingetjo pEyuva rOzombangaṋe mOtjomuise morutuu rovaheṋendu ovanane vombazu mu ve ha ri. Nandarire okakarata kovaheṋendu oporise ndji i yandja ovanane vombazu kave na ko kave ya pewa poo kave pewa. “Omapu otji ye ri omengi otji tu ha munika mohoronde ndji oyetu indji,” Ombara Maharero ma tja nao. Na weza kokutja nai Ovakwanyama tji va kurakura onawa.