OMUTHIYA - Anna Shekudja ota hokolola ta ti ongeshefa yaye yokulandifa omatiti, omalilo, oimbale naikwao otai ende nawa pefimbo eli leehango di li metifa molwaashi paife ovanhu otava lande oilongomwa yOshiwambo. Okwa ti eli olo efimbo liwa ovanhu ve hole okulanda oihongomwa yOshiwambo shaashi ova pumbwa okutwaalela omaano oinima yOshiwambo unene tuu omatiti. Onghee okwa kumaida oshiwana opo shi twikile nokufimaneka omufyuulukalo dash, tashi pitile mokulongifa oikwatelwa yOshiwambo. “Osha fimana ngeenge meumbo mu na oihongomwa yOshiwambo ngaashi omatiti, oimbale nomalilo. Omatiti okwa fimana shaashi ohaa longifwa okutula oshivelelwa ngeenge meumbo mwe ya ovaenda,” ta ti. Shekudja okwa dile komukunda Okashanakiingo, okwa ti okwa landifa oihongomwa yOshiwambo okudja momudo 1990.

“Ohandi landifa yoo vali oikulya yOshiwambo ngaashi oshingali, omingome, ombidi nomavanda,” ta ti. Okwa hokolola ta ti ongeshefa yaye oye mu etela oyuuyemo ihapu molwaashi paife okwa tunga mo neumbo laye noshoyo okuyambidida ofamili yaye. “Ondi na ounona vavali va mana omalihongo avo koiputudilo yopombada nde va futile noshimaliwa sha dja mongeshefa yange,” ta ti. Okwa weda po ta ti oku na yoo vali ofitola hai landifa oikulya yOshiwambo mOmuthiya haku longo outekulu waye. Okwa hokolola ta ti okwa longwa oilonga yokuhonga oinima yOshiwambo kuinakulu pefimbo kwa li e na omido 16.

fhamalwa@nepc.com.na