Simaneka Shikulo a yambukile mOshifo moshitopolwa shaMusati okwa ti, konima a li a kanitha iilonga ye mo2013, okwa li a ningi omimvo ndatu pevi omanga inaa tameka ongeshefa yoondjuhwa.
“Paife ohandi ithanwa “Chicken” omolwa ongeshefa yandje yoondjuhwa,” ta popi ngaaka.
Ta gwedha po ta ti, etameko ka kwa li epu, ashike ota pandula oshoka onkalo kayili ngaashi yali, konima a kanitha iilonga.
‘’Okwa li handi longo moositola yiikwafenitya, tango nda tameke moEllerince, furnmart andi huulile moLewis,” ta hokolola ngaaka.
Ta ti, ilonga sho yali ya kana onkalamwenyo okwa li ye mudhigupalele, nonando a kala takambadhala okukonga iilonga, ihe ita mono.
‘’Okwa li nda kwatwa kedhiladhilo lyokuninga omunafaalama. Onda tameke ongeshefa yandje yoondjuhwa oshowo omayi oomvula ntano dha pita, nonando ethimbo ndika oongeshefa moshilongo itadhi ende nawa omolwomukithi gwoCovid-19 ngoka kwa li gwa ponokele oshilongo, otatu endekele ngaa, hu itaku ziya,” Shikulo ta popi ngaaka.
“Sho nda tameke ongeshefa ndjika, okwa li nda tameke noondjuhwa 40, ihe nena ondina oondjuhwa dhi vule 400. Oondjuhwa ohadhi pe ndje omayi ngoka handi landitha,” Shikulo ta ti, ngaaka.
Omunafaalama gwoondjuhwa okwa ti, ongeshefa ndjoka oyo a ikolelela muyo, okuhupitha aakwanezimo ye oshowo okuhumitha komeho eilongo lye.
Ta kumagidha ta ti, oshimaliwa ihashi gwana, ihe okashona hoka to mono okutula omboloto poshitafula, oke vule owala.
Shikulo ta ti, ongeshefa ohayi humu komeho uuna to yi kaleke po ngoye mwene, oondjuhwa ohadhi pula iikulya, oshowo omiti.
“Ohandi lonigitha N$1 200 kehe konima yomasiku gaali okulanda ooshako mbali dhiikulya yoondjuhwa. Nonando shoka osho shimwe sho momashongo nda taalela, inandi sholola,” ta ti ngaaka.
Omunafalama gwoondjuhwa nomayi, ta ti etameko aluhe oha li kala edhigu, ihe ngele owuna shi li ohokwe nomukumo mwaashoka wa hala, oto shi mono.
“Onda hokana, ngame ondina egumbo lyandje. Ayihe mbyoka oyazi mongeshefa yondjuuhwa nomayi, otandi pandula,” ta pandula ngaaka.
Shikulo natango okwakumagidha natango aanyasha ta ti, naya zemo momitumba, naya kambadhale noongeshefa kehe, sha mpa ashike tayi eta omboloto poshitafula.