Elelo lyondoolopa yaNgwediva olya gandja ompito kaakalimo opo ya tameke okukala taya landitha iinima yawo kehe Etiyali nEtine.
Iipindi mbika ohayi gandja ompito kaakwashigwana opo ya landithe iilongomwa yawo yoludhi kehe, mbyoka hayi kala ya kwatela mo iikulya yopamuthigululwakalo, iikulya yiingulu noondjuhwa, iikutu, iilongithomwa yomomagumbo, iiyimati, oondjuhwa nakahe tuu.
Omukalo nguka ohagu longithwa nale kelelo lyaShakati nolyaShikuku, noyendji ohaye wu ithana oshipwatapwata omolwoshinamumwe shiilandithomwa.
Elelo lyondoolopa olya pititha omushangwa kutya otali ka pula owala oN$10 momuntu gumwe, notali hiya kehe gumwe e na ehalo opo a longithe ompito ndjoka.
Ehala ndyoka tali ka ningilwa iipindi otali kala tali talika ko ongehala lyomalandithilo mpoka aanangeshefa taya kala taya gongala okwiiyambula po nokwiitulila mo omayele nkene ye na okushingitha, iipindi yawo.
“Elalakano lyomawuliko giipindi gesiku limwe okugandja ompito kaanangeshefa aashona opo ya ulike nokushingitha iipindi yawo kookasitoma dha inekelwa okuthika siku ndyoka mehala limwe,’’ ya ti ngaaka.
Kehe ngoka ta ka pumbwa uuyelele wa gwedhwa po na dhenge konomola 065-238116.
Iipindi yoludhi nduka, hayi kala ko owala omasiku gamwe ashike moshiwike oga kala nokuningwa koondoolopa ngaashi Oshakati oshowo Oshikuku.
Omalelo ngoka oga li ga popi kutya oge ya po nomukalo ngoka opo ga gandje oompito kaantu ya landithe iinima yawo, unene mboka kaaye na omahala gokulanditha taga kalele.
Ondoolopa yaShikuku okwa li ya tula miilonga etokolo lyokuninga omangeshefelo kehe Etitatu koshiwike, okuza omumvo gwa yi.
Omugandji gomauyelele melelo lyondoolopa lyaShikuku John Siloiso okwa ti, shoka oye shi ningi ya landula moompadhi dhelelo lyondoolopa lyaShakati.
Ta ti, ohashi gandja ompito kaakwashigwana okulanda iinima ya kala noku yi konga moositola dhomomudhingoloko ihe kaye yi wete.
“Omawuliko giipindi ngoka oga nuninwa aanangeshefa oku ya pamwe nokutopolelathana omadhiladhilo gomangeshefelo. Pamukalo gu li ngaaka, otaya tungathana nokuyambulathanapo,” ta popi ngaaka.
Aakalimo yomOshakati oya pewa omasiku gaali moshiwike okulanditha iinima yawo okuza kiikulya sigo okiikutu.
Aantu mboka mOshakati ohaya landitha Omaandaaha nEtitano, haya landithile kondje yomatala.
“Etokolo ndika okwa li lya tulwa miilonga okuza omumvo gwa yi. Nando shoka sha tokolwa, opo tatu kundathana opo tu kale tatu gandja omasiku gaali moshiwike, shika etameko ashike,’’ ta ti ngaaka.
Siloiso ta ti, ompito ndjoka oya nuninwa aakalimo ayehe, unene mboka kaaye na omahala momatala oshowo mboka kaaye na omahala gokushingithila.
Ta gwedha po ta ti, ndjika oya ka kala ompito ombwaanawa kaakalimo mboka ya kala haya ka landa noku ka landitha iinima yawo kOshakati Etitano nOmaandaha.
“Ohatu pula ashike N$10 mehala lyiikutu oshowo N$20 momahala galwe mesiku.” ta ti ngaka.
Ta ti, mesiku ohaya pula ashike aantu ye li 100.