Eenhele domalukalwa mOngwediva vati odi li mo da pumba kovanafikola ava have ya koiputudilo yopombada.

Ongwediva vati oyo odoolopa imwe i na oiputudilo yopombada ihapu, noya idilila onduba yovanafikola vokoiputudilo yakula ya yooloka.

Mayola wodoolopa Taara Shalyefu okwa ti okwa li a mona omhito yokutalela po omalukalwa ovanafikola vahapu, nokwa dililika pe na omhumbwe yakula yeenhele dokuhiila di li monghalo i li xwepo.

“Ohandi shi popi kutya otwa pumbwa edu lakula opo hatu dulu okutunga omaumbo, ndele nghee e li po oovanafikola ashike ava ve ya koiputudilo shaashi otava mono oixuna,” Shalyefu ta ti. Shalyefu eshi okwe shi popya pefimbo a li ta nangelekelwa koshipundi shoumayola oshikando shititatu. Okwa twikila ko kutya moule weedula nhatu da ka pita, eshi odoolopa i li koshi yelelo laye okwa ti yee pamwe noilyo yelelodoolopa ova kendabala okueta eepomba dokunanena omeva peenhele odo da kala tadi nane noudjuu modoolopa, unene ngeenge tashi ya pomhumbwe yomeva. 

Okwa ti ova kendabala oku eta yoo omalamba momapandavanda oshiputudilo shaUNAM JEDS, a nuninwa eameno lovanafikola ngeenge tava ende po omaufiku oshoyo ovakwashiwana aveshe koonono.

Modoolopa okwa ti ova eta mo yoo otenga yakula yokupungula omeva i li kOmatando mOngwediva, ya nuninwa omeva aa haa kala a pata.Okwa twikila kutya omaxumokomesho amwepo oku li metifa, natango inaa pwa okulonga ngaashi eepate, naikwao ya wedwa po.

Shalyefu okwa ana moipafi yoshiwana kutya ota twikile nokuwanifa po oilonga yaye ongamayola wodoolopa yaNgwediva. Okwa ti ota twikile yoo okupwilikina komakemo ovakwashiwna noku a tula moilonga okuvatela apa ta dulu.

Okwa ti yoo ota twikile nokukala e na ekwatafano novanangeshefa modoolopa oshoyo oikondo ya yooloka, oshoyo okupula komesho nexumokomesho lodoolopa.

Oilyo ikwao pamwe naye melelodoolopa oyo Ulalia Katonyola omupedumayola. Fabian George, Naemi Amuthenu naJona Helao ovakulunhu vokomitiye, yee Ottilie Haitota naMathews Tiyaho oilyo yelelodoolopa.