Ohaputeka yedina Ours i li mEenhana oye li te yelwa kookalyamupombo mexuliloshivike nokuvaka mo oilandifomwa ngaashi omiti, omakende nomambale omutenya.
Oshiningwanima oshaningwa Olomakaya konguloshi modoolopa yaEenhana.
Omupopiliko wopolifi moshitukulwa shaHangwena Warrant Andreas Nghiyolwa okwa hokolola ta ti ovafekelwa ova ponokelwa ohaputeka nokuvaka mo oinima i li pongushu yoshimaliwa sheeN$47 000.
Okwa ti mohaputeka omwa kufwa yoo vali oshimaliwa keemuma sheeN$10 000.
Nghiyolwa okwa ti fiyo opapa ka pena omunhu a kwatwa po molwashi ka pena ouyelele kombinga yovafekelwa ava.
Okwa pula moshiwana kwau ta ka mona omunhu ta landifa omiti ile omambale omutenya, omakende ile eenghaku opo oshiwana shi lopotele opolifi keshe i li popepi.
Okwa yelifa ta ti opolifi ita popya edina lomunhu ta ka yandja ouyelele kombinga yovafekelwa ava.
Okwa ti ota ku fekelwa kutya ookalyamupombo ava ove na okukala va ka landifa oinima ei keedolopa da yooloka onghee okwa indila oshiwana opo shi longele kumwe nopolifi.