Commissioner koshikondo shomavyulonghalo moNamibia Sam Shaalulange ota hokolola ta ti ovanadolongo vamwe otava kengelele ovanhu, tava landifa oinima yoipupulu unene komalungula.
Shaalulange ta ti ovanadolongo ohava kala tava tula oinima komalungula ngaashi eetuwa, eembete, oilongifo yokeefalama, omaumbo, oimuna, eeTV nosho tuu oinima ikwao ya yooloka hai dulu okulandifwa.
Pefimbo a ninga eenghundafana naKundafa Etivali Shaalulange okwa popya ta ti ombelewa yaye oya kala nokulopotelwa ovanadolongo vamwe tava kengelele oshiwana kutya ohava landifa oinima.
Shaalulange okwa yelifa ta ti ovanadolongo ohava kala tava longifa eengodi dopeke okuheka oshiwana eshi shi li kondje eshi hava tumine ovanhu omafano oipupulu, tava ti kutya ove na oinima tai landifwa.
Okwa ti ovanadolongo ohava kala ve li mekwatafana nookaume ile ovakwapata vavo tava longele kumwe nghee ve na okukengelela oshiwana kombinga yoinima yoipupulu ei hava kala tava tula komalungula.
“Ovanadolongo ohava ningilwa oukalata voipindi kovanhu ve li kondje yodolongo, ovo hava kala ve na efano lotuwa ile eumbo. Konima ngeenge omunadolongo okwa tuminwa okakalata koipindi, ohe ka tula komalungula ndele ta shange po onomala yongodi yaye kutya ota landifa otuwa ile eumbo kombilixa,” Shaalulange ta ti.
Okwa popya ta ti oinima hai tulwa komalungula kovanadolongo ohai kala i na ombilixa unene shaashi omunadolongo oha lalakanene ashike okumona oshimaliwa.
Shaalulange okwa ti konima ngeenge omunadolongo okwa tuminwa oshimaliwa, oye shi tumine komunhu ou ve li naye mekwatafo lokukengelela ovanhu.
“Ovanadolongo ohava kala ve na eembapila doipupulu va ningilwa kovanhu ve li kondje yodolongo, odo hadi kala di na ouyelele aushe we lixwa po wotuwa ile weumbo. Ohava tumine nee ovanhu eembaapila odo tava popi oipupulu kutya otuwa ile eumbo olaye,” Shaalulange ta ti.
Okwa ti vamwe ohava kala ve na oumutwe woshilongo woipupulu hava longifa okutumina ovanhu ngeenge tava pula omaufemba avo.
Shaalulange okwa ti oshiwana nashi kale sha kotoka ngeenge tashi lande oinima okudilila komalungula shaashi oinima imwe ohai kala yoipupulu.
“Omafiku aa ombelewa yange oya potelwa omunhu a kengelelwa eshi a tumina omunadolongo N$14 000 eshi a landa oinima yomeumbo ngaashi eeTV neembete komunadolongo, ashike oipupulu kwa li,” Shaalulange ta ti.
Okwa ti ku keshe omunadolongo ta ka hangika ta kengelele ovanhu mokulandifa oinima yoipupulu ota ka kala a patululiwa oshibofa oshitivali pamwe nomunhu ou kwa li tava longele kumwe naye.
“Oshiwana nashi xulife po okukala tashi vakale ovanadolongo eengodi shaashi paife eengodi dopeke otadi longifwa oinima youmbudi,” Shaalulange ta ti.