Victoria Kaapanda
Aafuthi oya yi ontuku nookompiuta dhopeke (laptop) dhi li 50, noshowo iinima yilwe. Oshiningwanima shika osha dhimbululwa mehuliloshiwike moshitopolwa shaKhomas.
Sha ikolelela kolopota yopolisi, ookompiuta ndhoka okwa li dha yakwa mehangano tali ithanwa Harvest Financial Investement koKlein Windhoek.
Okwa lopotwa kutya kakuniwe ontseyo esiku nethimbo ndjoka ookompiuta ndhoka dha yakwa po. Otaku hokololwa kutya aafuthi oya kutha mo ookompiuta dhopeke dhi li 50, omapakete giikunwa ge li gatano, epakete lyosuuka oshowo lyokoofiwa.
Kape na shoka sha monika po.
Opolisi inayi totha mo ngele pehala mpoka open a nenge kape na omukeleli gwomaliko. Ngashiingeyi opolisi otayi indile oshigwana shi longele kumwe opo aantu mboka ya yaka po ookompiuta ndhoka ya mangwe.
Tayi ti kehe ngoka ta ka mona omuntu ta landitha ookompiuta dhopeke, kaadhi na oombapila na lopotele opolisi yi li popepi naye. Ya gwedha po kutya aafuthi mboka ohaya ka landitha unene kaalongwa yokiiputudhilo yopombanda koondando dhi li pevi lela.
Onkene aalongwa otaya londodhwa kaaya lande iinima kaayi na oombapila momapandaanda, oshoka otashi ya tula muupyakadhi. Ya gwedhapo kutya ngoka ta ka adhika noshinima sha yakwa, kaashi na oombapila nangoye omufuthi, onkene oto mangwa po.
Moshiningwanima inaashi faathana, omulumentu gwomimvo 21, oku li moshipangelo koWindhoek monkalo ombwiinayi, sho a tetwa omuligu kukuume ke gwomimvo 19.
Sha ikolela kolopota yopolisi yiiningwanima ya holoka mehuliloshiwike, oshiningwanima shoka osha holoka molukanda DRC momundhingoloko gwOtjiwarongo, Olyomakaya.
Otaku hokololwa kutya ookuume mboka okwa li ya tokelwa pamwe Etitano, noya li ya gwedhathana oshimaliwa okulanda iikunwa yawo.
Nakufekelwa anuwa okwa li a meneka ongula yOlyomakaya, a yi kaandja yakuume ke a ka pula ko iimaliwa ye mbyoka ya li yi igwedha.
Shoka anuwa okwa li sha eta enyenyeto pokati kawo yaali, sigo nakufekelwa a kutha mo ombele yokapi nokuteta kuume ke omuligu.
Omulumentu ngoka okwa li a tuminwa koshipangelo koWindhoek meondeelelo omolwonkalo ombwiinayi e li muyo. Nakufekelwa okwa patuluilwa oshipotha shonkambadhala yedhipago.
vkaapanda@nepc.com.na