Elelo lyondoolopa yaShakati melongelokumwe nehangano lyomalushuno Oshakati Premier Electric, otaga ka longitha oomilliona dha thika poN$11.5 okwaandjaneka olusheno kaakalimo yokOnawa Extension 7 oshowo 8.
Minista gweyambulepo lyiitopolwa noondoolopa Erastus Uutoni mehuliloshiwike okwa kwashilipaleke olusheno ndoka talu ka andjanekwa kOnawa kaakalimo mboka ya tembudhwa okuza kolukanda Oshoopala.
Esiku olyo tuu ndyoka Uutoni okwa li a patulula ombelewa yakadhimamulilo mEhenye, ndyoka kwa li ya tungwa koshimaliwa shoomilliona N$6.7 omanga inaa tsikila a kapatulile lwahugunina ehala lyiiyagaya ndyoka kwa li lya longwa koomilliona N$6.5, kOthingo.
Ondoolopa yaShakati omimvo dha piti okwa li ya tameke okutembudhila omalukanda ga yooloka kOnawa, nelalakano lyokuyambulapo ondoolopa.
Mo2020 elelo lyondoolopa lyaShakati, melongelokumwe nepangelo, okwa li ya gandja olusheno kaakalimo yokOnawa Extension 4, 5 oshowo 6 kongushu yoomiliona N$11.
Mongashiingeyi kOnawa oku na omahala ga thika po2000.
Uutoni esiku ndyoka okwa li a pandula elelo lyondoolopa sho tali longo lyi itula mo, okweetela aakalimo yawo omauwanawa.
Ta ti, olusheno ndoka lwa tamekwa nale okulongwa otalu ka andjanekwa kongushu yoshimaliwa shoomilliona N$11.5 notali ka kandja olusheno kaantu ya thika 700.
“Omauwanawa agehe ngoka ohaga holoka omolwepangelo, uuna aaleli yoondolopa ye shi tula miilonga. Shika tashi longwa kelelo lyondoolopa lyOshakati, otashi hokitha noonkondo notashi ulike nkene ye na ohole naakalimo yawo,” ta ti ngaaka.
Ta ti, ondoolopa ndjoka otayi monika nawa, nomalelo goondoolopa galwe naga kuthe ko oshiholelwa oshiwa nawa.
Ta popi ta ti, ndika ethano ewanawa noonkondo, nehala kehe olyina iinima ayihe tayi vulu oku ya kwatha okulonga iilonga yimwe opo ya mono uuhupilo.
Omukuluntu gwehangano lyo-OPE Nelson Sheya esiku ndyoka okwa popi ta ti, ehangano lyolusheno otali tsikile okuyambidhidha aakalimo yomOshakati naampoka taya vulu.
“Sho kwali twa tameke okuninga omayalulo gaakalimo kaaye na olusheno mOshakati omimvo dha piti, tango okwa li twa mono aantu ya pita 1 000, ihe ngashiingeyi otwa gandja omalusheno goshali kaantu ye vule 2 500 momalukanda oshowo momikunda dha ndhingoloka ondoolopa yaShakati,” ta popi ngaaka.
Ta fatulula ta ti, omikunda ndhoka dha li dha tothwa mo ongaashi Oshandubala , Onendongo, Othingo, Emono oshowo Onawa hoka kwa ipyakidhilwa nako paife.
Sheya okwa tsikile ta ti, okupitila moproyeka moka, mboka ya mono omauwanawa ngoka golusheno lwoshali natango otaya ka ninga aanelego okukala taya landa olusheno lwooyuniti dhi li pevi.
Ngoloneya gwoshitopolwa shaShana Elia Irimari esiku ndyoka okwa popi ta ti, omauwanawa ga kala nokulongwa kelelo lyondoolopa yOshakati onkene taga tsikile.
“Aakalimo yomOshakati oyo aanelago, oshoka shoka ya longelwa kelelo lyondoolopa lyawo momimvo omishona, inashi ningwa mo nale muka,” ta tanga ngaaka.
Irimari ta ti, shoka shi na oshilonga okuyambula po oonkalamwenyo dhaamboka ye li monkalo tayi yemateke, ya kale wo momindhingoloko tadhi hokitha nodhi na iinima ayihe.
Mayola gondoolopa yaShakati Leonard Hango okwa ti monakuyiwa Oshakati itashi ka kala we shi na omalukanda kaage li pamuthika.
“Pethimbo ndika olukanda lwaPohamba nalo olu li metifa okulongwa, okutulwa pondondo yimwe nOnawa,” Hango ta ti ngaka.
Ta gwedha po ta ti, omalukanda ngaashi Oneshila, Kandjengedi oshowo Uupindi nago oga thanekwa okutulwa pamuthika gondoolopa.
Maria Shixwadi ngoka a tembudhilwa kOnawa okwa ti, yo oya pandula nonando kakwa li yu uvite ko tango elalakano lyokutembudhwa.
“Out li momahala getu gaagundjuka nawa, ga yela, nena natango otwa kundana onkundana ombwaanawa tatu etelwa olusheno,” ta pandula ngaaka.
- vkaapanda@nepc.com.na