Aantu yatano oya hulitha mehuliloshiwike moshitopolwa shaOtjozondjupa, miiponga iyali, mbyoka ayihe ya ningilwa mopate onene yoB1. 

Epeko lyopolisi olya ulike kutya aantu yane oya sile moshiponga shoka sha ningwa konyala ookilometa 84 muumbangalantu wOtjiwarongo okuuka Okahandja sho omuhingi woshihauto shoToyota Legend 45 a idhenge omutse nomutse noVolkswagen ontokele, pethimbo a li ta kambadhala okusineya eloli.

“Aantu yane, mwa kwatelwa omuhingi gwokaPolo, oshowo omunamimvo 70 omuhingi gwoToyota ngoka e li omukwashigwana gwaSouth Africa, ayehe oya hulitha. 

Aafaalelwa ayehe kumwe yatatu mboka ya li miiyendithi ayihe – aanona yaali, nomukuluntu gumwe oya mona iiponga noya falwa koshipangelo kOkahandja.

Oshiponga oshitiyali osha ningwa lwopotundi 01h20, sho eloli lyoIveco, kwali tali ziilile konooli li na aantu yaali, mwa kwatelwa ndalaiva, lyiidhenge mumwe noFord Ranger ndjoka yali tayi zi kuumbangalantu yuuka kOtavi.

Shika osha eta omuhingi gwoFord Ranger a nyengwe oku pangela osheenditho she, e tashi galangata. Okamatyona koomvula 14, hoka ka tongololwa kutya oko Isack Ndjamba oka hulithile pehala lyoshiponga.

Aantu yahamano, mwa kwatelwa omuhingi gweloli nomufaalelwa gwe naantu yatatu ya li moFord oya mono iiponga, imwe iishona nayamwe oya ehama noonkondo. Otaya mono uuhaku kOtjiwarongo State Hospital.
Omakonaakono gopolisi miipotha ayihe iyali otaga tsikile.  -Nampa