Ovanhu 26 okwa li va tambulilwa moshipangelo shaTavi oshivike sha dja ko konima eshi vati va lya ombelela yoshinamwenyo shongolo.
Omukulunhuwiliki wouhaku moshitukulwa Otjozondjupa Gerbardo Timotheus okwa koleka ta ti mEtine loshivike sha dja ko ombelewa yaye oya lopotelwa ovanhu va tambulilwa moshipangelo molwaashi vati va lya ombelela ya tulwa oudio.
“Ovanhu ova tameka tava kungu nokuvela momadimo nokonima ova twalwa koshipangelo,” ta hokolola. Timotheus okwa ti pefimbo ovanhu ve li moshipangelo okwa dja ovanhu tava yandje ouyelele kovapangi kutya ovanhu ova lya ombelela ya tulwa oudio, vati ve i landa kolukanda.
Okwa ti kape na omunhu a lopotwa a xulifa novanhu aveshe ova lekelwa mo moshipangelo efiku la landula ko.
Okwa weda po ta ti omukulupe umwe womukainhu oye kwa li a didilikwa kwa li e li monghalo idjuu ashike okwa veluka konima yepango.
“Nonande oshipangelo sha pewa ouyelele kutya ovanhu ova lya ombelela ya tulwa oudio ovanailonga vouhaku inava koleka oshikumungu eshi ngeenge oshoshili, onghee oidjemo yomakonakono inai dja mo natango,” Timotheus ta ti.
Okwa kumaida oshiwana opo shi kala tashi pula ouyelele kutya ombelela oya dja peni tete manga inashi landa okapana ile ombelela yoku ka teleka.
Okwa ti oshiwana nashi kale sha kotoka ngeenge tashi lande ombelela momapandaanda molwaashi okwa didilikwa ovanhu hava landifa ombelela yoinamwenyo ya ninga nai ile oinamwenyo ye lifila konima ya kwatwa komukifi wonhumba.
“Oshiwana nashi kwatafane neembelewa douhaku opo shi pule ouyelele kombinga yovanhu tava landifa ombelela,” ta ti.
Eshi a kwatafana naKundana omu p o p i l i ko wo p o l i f i moshitukulwa shaOtjozondjupa Inspekta Maureen Mbeha okwa koleka ta ti konima eshi opolifi ya ninga omakonakono kombinga yoshikumungu eshi opolifi oya mona ouyelele kutya ovanhu ova lya ombelela yoshinamwenyo she lifila shaashi okwa li tashi vele.
Onghee okwa yelifa ta ti ombelela inai tulwa oudilo ashike oya ninga nai.
Okwa ti kape na oshibofa sha patululwa kombinga yoshikumungu eshi.
fhamalwa@nepc.com.na