ONGWEDIVA - Uuministeli womidhingoloko, iihwa nomapashiyono owa ndhindhilike omatego giiyamakuti ya gamenwa taga indjipala mEtosha.

Shoka oye shi ndhindhilike konima ya li ya gongele oondhalate dhi thike 62 momundhingoloko gwEtosha pokati komwedhi Juni naAguste.

Omugandji gomauyelele muuministeli womindhingoloko, iihwa nomapashiyono Romeo Muyunda okwa ti oya li ya lopotelwa kaatelelipo mboka ya li ya limbililwa kiiyamakuti ya yooloka yi na oondhalate moothingo. “Ekutho lyoondhalate kiiyamakuti, oshinima sha kehe siku mEtosha. Otwa ndhindhilike kutya iiyamakuti ohayi tegwa kaakalimo yomEtosha, nelalakano lyokudhipaga iiyamakuti ya mone onyama yokulya,” ta fatulula ngaaka.

 Ta ti, momundhingoloko gwEtosha ohamu zi aantu ya thika 400, nopethimbo oondhalate ndhoka kwa li dha gongelwa, okwa li kwa monika oompadhi dhaantu dha lyatagana.

Ta gwedha po ta ti, etego lyiimuna inali pitikwa nando kuuministeli wawo, nakehe ngoka ta ka mangwa ta tege iiyamakuti ya gamenwa, otaka pewa eegeelo enene.

“Nuumvo muJuni, uuministeli owa li wa imanga kumwe netanga lyegameno oshowo opolisi yaNamibia opo ya ninge oshikonga shaamboka haya tege iiyamakutu oshowo oku yi kutha oondhalate ndhoka,” ta popi ngaaka. 

Natango okwa li ya ningile aakalimo yomEtosha oshigongi, taya londondhwa ya hulithe po shoka taya ningi oshowo okufatululilwa uunene weyono ndyoka.

Muyunda okwa ti, omatego giiyamakuti otaga lopotwa komahala agehe ga gamenwa.

“Otatu kumagidha aatelelipo oshowo kehe ngoka taka mona iiningwanima yi li ngaaka tayi holoka nenge a mono oshiyamakuti sha tegwa, ya lopotele uuministeli, opo ku kuthwe onkatu yomeendelelo,” ta ti ngaaka.

 Ta popi ta ti, Etosha ehala lya simana, nongele iiningwanima yi li ngaaka otayi holoka, oshigwana otashi ngushulula ehala.

Ta fatulula kutya ngele okwa monika kutya ope na aanambelewa nenge aaniilonga yuuministeli wawo taya longo iilonga yi li ngaaka, otaya ka longiwa nayo, sha ikolela koompango nomalandulathano ye ga shi kombinga yiiningwanima ngambyoka.

Muyamba ta ti, uuministeli womidhingoloko, mekwathelo nelongelokumwe lyopolisi, etanga lyegameno oshowo aakwatheli yalwe, owa nkondopeka omatati gokutula miilonga oveta yegamenenopo lyiiyamakuti, opo uupyakadhi mbuka wu hule po nenge wu shonopale.  “Okuza 2017 oondjamba dhi li 50 okwa li dha dhipagwa, 2018 odha li 27, 2019 odha li 13, 2020 odha li 12 omanga omumvo gwa yi dha li ashike hetatu,’’ Muyunda ta totha mo ngaaka. Ta ti, omwaalu ngoka otagu ulike lela gwa shonopala omimvo dha piti, naashoka otashi ulike nkene aagameni yiiyamakuti ya kala taya longo ya itula mo.

Muyunda okwa li a kumagidha oshigwana shi hulithe po okudhipaga iiyamakuti ya gamenwa mEtosha.

“Iiyamakuti ngaashi oompanda, oondjamba oshowo oongaka oonkalamwenyo dhawo odhi li moshiponga oshoka oyo unene hayi dhipagwa omolwongushu yiilyo yawo,” ta ti ngaaka.

Ta ti, nonande ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambadhala okulongitha oompito adhihe okukonda ooveta ndhoka.

Sha ikolelela kiikundaneki yilwe, omutamanekindjayi Martha Imalwa okwa li a popi kutya iikoya kombinga yiiyamakuti moNamibia oya kala yi li pombanda noonkondo noshinima shoka oshe eta eikwatopomutima kombinga yegameno lyuushitwe woshilongo oshowo eyonagulo lyomidhingoloko. vkaapanda@nepc.com.na

Imalwa okwa popi kutya otashi kala owala nawa uuna aantu ayehe ya longele kumwe okuvudha mo iimbuluma tayi longelwa iiyamakuti.