Omuhwahwameki gwomaudhano goongonyo Omutanzania Shomari Kimbau otyaa hilathana nambushe miilonga Omunamibia Nestor Tobias molwiifuta inaayi gandjwa kaadhengingonyo Aatanzania sho ya li ya kutha ombinga moshiindingili shuudhano shoPart 10 shoka sha li ko muSepetemba nuumvo. MTC Nestor Sunshine Tobias Boxing and Fitness Academy okwa li a unganeke uudhano wa li ko mesiku 01 Sepetemba mOngwediva Trade Fair Centre moka aadhengingonyo Aanambia ya li ya ningi ka tambula ka kwata noombushe miilonga ya za kondje yiilongo.
Omudhengingonyo Omutanzania Iddi Salamu Pialari Mzee naJoseph Maigwisya oya li ya kutha ombinga. Oya li ya ipe dhopomeho nayakwawo Aanamibia, Charles Shinima naPaulinus Ndjolonimus.
Iiwike ihamano konima yuudhano wawo, aadhengingonyo mbaka onkene natango ye li metegelelo lyofuto yawo noya ninga omakwatathano ngashiingeyi noongongahangano dhomaudhano dhoNamibia Professional Boxing and Wrestling Control Board ya pitike uudhano, osho wo ya kwatathana nomuhwahwameki Nestor Tobias, ashike inaya pewa ko omayamukulo taga eta okulya. Moonkundathana naNampa, Kimbau gwoGolden Boy Africa Promotion INC, ngoka e li wo oye omutonateliwiliki gwaMaigwisya, okwa li a ulike euvonayi lye sho aadhengingonyo ye li metonatelo lye inaaya futwa shoka ya uvanekelwa sigo okeluwa ndi.
“Otatu tumwaatumwa ashike kuTobias. Okwa ti iimaliwa okwe yi futa okupitila muJuniour (Bongi), katu shi elalakano lyaashoka, oshoka okwa li a lombwele aadhani yetu ya ye mela lyondjila mOsoondaha mbala konima yuudhano, niimaliwa oya li yi na okufutwa komudheuli gwetu Edward Lyakwipa ngoka a li a kala moNamibia sigo omomasiku 28 Sepetemba 2023 ngaashi twa uvathana,” ta ti ngaaka.
Tobias okwa li a ulike uumbangi wuumbapila womafutilo ngoka ga li ga ningwa momasiku 06 nomasiku 19 Sepetemba osho wo momasiku 10 Kotomba, wa futwa Assoya Boxing Club, ndjoka mwene gwayo Junior Bongi. Bongi okwa li a shangithwa ongomudheuli momukanda ngoka gwa longithwa kosipana yAatanzania sho ya thiki moNamibia. Tobias okwa ti okwa ninga oshinima shi li mondjila sho a futu komuntu ngoka a li e ya naadhani onga omuwiliki gwosipana (Junior Bongi).
“Onda enda ongomudheuli osho wo omuhwahwameki naadhengingonyo muuyuni. Omukalondjigilile ohandi futwa ngame tandi futu aadhani, onkene kandi shi uvite kutya omolwashike ndi na okufuta aamentu mboka ngele oye na omukalelipo gwawo omuwiliki gwosipana,” ta ti ngaaka.
Ashike Kimbau ke shi uvite ko kutya omolwashike Tobias a kaleke gumwe gomaadheuli ye moshilongo nokuhogolola a fute Bongi ngoka kee shi omukalelipo nando ogwomudhnai gumwe muudhano mbuka wa li ko.
Oshikundaneki shoNampa sho sha li sha kwatathana naBongi, okwa koleke kutya okwa futwa shili kuTobias.
“Ashike, oakaunta yandje ityai longo manga, oya kankamekwa koombaanga dhaSouth Africa omolwovisa yandje ya kusha, niimaliwa otandi ke yi tumina kaadhengingoyo yaTanzania uuna sha potokononwa,” ta ti ngaaka.
Nampa