Uuministeli wuuhaku owa waimina oAfrican Union noku tula miilonga omukalo gwoku tula oonzapo dhotuntila yoCovid-19 kookompiyuta dhopamalungula.

Sha ikolela komushangwa gwa pitithwa komukuluntu guuministeli wuhaku nonkalo nawa Ben Nangombe okwa ti, shoka osha li shayi miilonga okuza momasiku 26 gaApilili nuumvo.

“Etokolo ndika okwa li lya yi miilonga mekwatathano nelongelo kumwe nehangano lyuukumwe waAfrica oshowo ehangano ta li ithanwa PenaBios Consortium,” ta ti ngaaka.

Nangombe ta ti, omukalo ngoka otagu ka longa pamukalo gopautekinika no tagu ka longithwa kaayendinandjila okuulika onzapo ndyoka kehe mpoka eli.

‘’Shoka okwa li sha pitikwa moNambia konima uuministeli wuuhaku nonkalo nawa wa li wa ndhindhilike uupyakadhi nuulingilingi hau ningwa kaantu una taya ulike oonzapo dhetuntilo dhiifundja,” ta fatulula ngaka.

Oshigwana osha kala tashi longitha uukalata okulika etintilo lyawo uuna tashi pitimo moshilongo. 

Ta gwedha po kutya mongaashingeyi otashi ka kala oshipu okulika oonzapo dhetuntilo okupitila komalungula.

“Onzapo ndjoka otayi kagandjwa ashike kaantu mboka yatuntilwa iikando ayihe ya pwako. Onzapo ndyoka natango otayi ka gandjwa no code QR. Okupitila komalungula, gumwe okuna okuholola uukwatya womukanda gwokuya kondje yoshilongo opo kupitikwe okumona uuyelele wonzapo tayi ulike etuntilo lyokukeelela oCovid-19,” ta fatulula ngaaka.

Kehe ngoka ena ehalo lyokuuva uuyelele owindji na kwatathane naanambelewa konomala hayi gandja omayakulo kombinga yomayakulo goCovid-19, ndyoka 0800 100 100.

– vkaapanda@nepc.com.an