Uuministeli welongo owa tseyitha kutya oosikola dhi li ntano odha pata moshitopolwa shaShana omolwaalongwa aashona poosikola ndhoka.
Omupevikuluntu gwelongo moshitopolwa shaShana Hilma Nuunyango okwa popi kutya oosikola ndhoka dha pata odho Ongako, Ekuwa, Andambombali, Uupeke oshowo Ondjungolume Junior Primary.
“Oosikola adhihe nda zi nokutumbula odhi li kuushayi, nodha pata pokati komimvo 2016 sigo 2022 omolwaanona ya ningi aashona momwaalu naamboka ya hupu po okwa li twe ya tembudhile koosikola dhopopepi,” ta popi ngaaka.
Nuunyango okwa fatulula kutya nonando oosikola ndhoka dha pata omatungo gamwe otaga longithwa niinyangadhalwa yilwe.
Ta ti osikola Andambombali oshowo Uupeke ohadhi longithwa okugandja elongo lyaakuluntu, ano oolitelasi momindhingoloko moka.
“Osikola Ongako ngashiingeyi ohayi longithwa kuuministeli wuuhaku ongokapangelo okashona, omanga oosikola Ondjungolume oshowo Ekuwa ihadhi longelwa sha,” ta popi ngaaka.
Omukuluntuwiliki muuministeli welongo Sanet Steenkamp okwa ti osikola opo yi tsikile okuya komeho, oyi na okukala yi na aalongwa ye vule 35.
“Okuza omimvo ntano dha piti, uuministeli owa kala nokuninga omakonakono goosikola dhi na aanona aashona momwaalu ndhoka itaadhi vulu okutsikila okuya komeho nelongo,” ta popi ngaaka.
Ta fatulula kutya, osikola ngele oyi na ashike aalongwa 50 nenge 70, ohashi ya pula ya konge aalongi ya dheuka, shoka natango itaashi tsu kumwe oshoka aalongi oya pumbiwa unene hoka ku na aalongwa oyendji.
Ta ti, shika osha etwa unene kaavali taya tumu aanona yawo koosikola dhokoondoolopa.
“Uupyakadhi mbuka uunene, oshoka ohashi eta aalongi mboka ya li poosikola ndhoka dha pata, ya tumwe koosikola dhimwe oshowo aalongwa, shoka hashi vulu okutula aavali muupyakadhi womahala gokuza, nokusila aanona oshimpwiyu,” ta fatulula ngaaka.
Ta gwedha po kutya nonando haya tumu aalongwa koosikola dhilwe, ohaya kondolola omwaalu kehe omulongi e na okulonga.
Steenkamp okwa popi kutya epato lyosikola otali holoka miitopolwa ayihe, omolwoosikola dh ina ashike aanona ye li meni lye-100.
Uuministeli owa dhidhilike oosikola dhi li 350 moshilongo dhina aalongwa ye thike 100, ihe owu na ondungethaneko yokuhumitha komeho oosikola ndhoka, ya gwedhe mo aalongwa mboka ye li koosikola dhina aalongwa aashona momwaalu.