Taimi Haihambo

ONGWEDIVA - Ndilipomwene Sheekuli oo E li omukulunhu wehangano hali ifanwa Majesty Cash Loan opamwe neumbo laye, onghela ova yandja omaano ongushu YA konda poN$25 000 kopolifi moshitukulwa shaShana. 

Omaano oikwafifo oyo ya yandjwa okwa kwatela mo ngaashi eetoshe, oipakete yeembapila, omeva okunwa, ohinga yokudengifa oihako, oundjakete vokudjala nenge ovapolifi tava patolola oufiku, nosho tuu. Oyo aishe kumwe oi na ongushu yoN$15 000.  Ova yandja yoo otyeke yoN$10 000.

Komanda wopolifi moshitukulwa shaShana Commissioner Naftal Sakaria okwa ti omwaalu woimaliwa oyo va pewa yoN$10 000, otave ke i longifa okulanda eemhumbwe dopolifi. Sakaria ta ti voo naSheekuli ova panga oukaume okudilila komalungula pefimbo Sheekuli a li e li koUnited Kingdom oko ha pange nande e li omukwashiwana waNamibia. Sakaria okwa tumbula kutya Sheekuli okwa li a tuwa omukumo ketanga lopolifi moshitukulwa shaShana molwoilonga ei tali longo nokwa udaneka kutya ota ka kufa ombinga mokuvatela noikwafifo apa ta dulu. Okwa weda po yoo kutya eshi ote ke shi ninga ashike ngee a mono omhito yokuuya koNamibia. “Hano nena eenghundafana edi twa li twe likunda, nomhunu oo nda shakena ashike naye komalungula oda ninga doshili,” Sakaria ta weda po. Sakaria okwa ti yoo kutya yee nghee a dalelwe a mone nande oSheekuli momghalamwenyo yaye, opo ashike te mu mono ngaho, ove lishi ashike okudidlila komalungula. 

Commissioner okwa tumbula kutya, oshinima shiwa shili okutota oukaume tau dilile komalungula ashike ota kughilile ovakwashiwana va kotokele ookalyamupombo shaashi havanhu aveshe ve na oshili.

Sakaria okwa weda po yoo kutya ove udite lela etumba, nove udite lela ve na elao ngee ovakwashiwana tava kufa ombinga mokuvatela shaashi eemhumbwe dopolifi ihadi pu. “Onda hala lela okuyandja olupandu lakula kofamili yaSheekuli,” Commissioner ta tumbula. “Otwa kufa edilaadilo opo tu kufe ombinga mokuvatela etanga leameno apa hatu dulu, shaashi ohali longo unene oilonga ya fimana ngee tashi ya peameno loshiwana omo nafye twa kwatelwa mo onga ovanangeshefa,” Sheekeuli ta tumbula. Ngeno okwa li ovanangeshefa vahapu tava dulu okukufa ombinga mekwafo la tya ngaha, ngeno etanga leameno otali dulu yoo okulonga noupu. “Ohatu yandje oipumbiwa ei opo tu dule okuvatela epangelo mokulanda eemhumbwe dimwe dopolifi,” Sheekuli ta weda po. Sheekuli okwa kundaneka yoo kutya eli halo ashike ekwafo hava yandje, ohava vatele yoo ovanhu vahapu ve li meemumbwe. 

Sakaria okwa weda po yoo kutya eemwiya daShinana ode lipyakidila nokutula oveta moilonga ngee tashi ya pokupalula efimbo alishe.  Ota kunghilile ovakwashiwana vaha longife omalodu ngee tava shingi unene tuu pexuliloshivike molwaashi otava eta oiponga. “Keshe tuu ou ta ka longifa omalodu ndele ita dulu okushinga, ou na oufemba wokudengela opolifi opo i kutwale keumbo oshali,” Sakaria tati.