Omukulunhu wopolifi moshitukulwa shaShana Commissioner Naftal Sakaria okwa ti opolifi oya ninga oshikonga shokulwifa oimbuluma osho sha tulilwa po omaulikilo oipindi mOngwediva.
Sakaria kwa ti oshikonga osha tameka nale oshivike sha dja ko notashi ka xula ngeenge omauliko a piti.
“Oshikonga otashi ka longo efimbo keshe - ongula noufiku. Ohatu lalakanene okulwifa oimbuluma pefimbo lomaulikilo oipindi,” Sakaria ta ti.
Okwa ti e li olo efimbo modoolopa yaNgwediva hamu haya ovanhhu va dja koitukulwa ya yooloka nokondjeyoshilongo, onghee osha fimana ngeenge ovanhu neengeshefa davo va kale ve li meano.
Okwa weda po ta ti ovanangeshefa va dja kondjeyoshilongo nava kale va manguluka okuninga omangeshefelo avo molwashi eameno omo lili lawana moshitukulwa.
“Ovanambelewa vopolifi onde va komanda nale opo va longe noudidini okukwata po ookalyamupombo ovo tava nyeke ko omaliko ovanhu,” ta ti.
Okwa weda po ta ti ovapolifi nava kale tava endelele ngeenge va lopotelwa oshimbuluma shonhumba opo ombudi i kale ya ka tukilwa onghatu diva.
Sakaria okwa kumaida oshiwana opo shiha umbate oilwifo ngeenge tashi i komaulikilo oipindi molwashi eameno opo li li lawana.
“Ovanhu nava kotoke ngeenge tava londo eelefa efimbo loufiku nomutenya molwashi ovashingi veelefa vopaife navo ove li ninga ookalyamupombo nohava nyeke ovanhu omaliko avo,” ta ti.
Onghee okwa ti omaulikilo oipindi ihaa etelele ashike ovanangeshefa novataleli po, ashike oha ma etelele yoo eembudi dihapu tadi di keenhele da yooloka.
Okwa kumaida oshiwana shiha fiye meetuwa omaliko asho ngaashi eengodi, eendjato neekompiuta shi nashi kwashipaleke kutya eetuwa oda pata.
“Opolifi otai ka kala ina okatala momaulikilo oipindi tai yandje omayakulo opashiwana onghee oshiwana nashi talele po okatala kopolifi,” ta ti.
Caption: