ONGWEDIVA - Opolifi oya lopotelwa oibofa youlunga i li 13 ya ningwa mexuliloshivike.

Imwe yomoibofa oya hokolola kutya, opolifi oya lopotelwa eteyo lomangeshefelo aCengas koNorthern Industrial Area mOvenduka. Okwa hokololwa kutya ovafekelwa vane ove liteyela monhele yomangeshefelo ndele tava denge nokumanga omutonateli womaliko oo a hangika eli molufo. Konima vati ovafekelwa ova ya meni lomangeshefelo ndele tava kufa mo omwaalu woimaliwa N$68 325 oshoyo omaliko ongushu yoN$ 25 150.

Moiningwanima ikwao omwa lopotwa omukulupe weedula 61 a li e ke lihafifa ko Anha’s Lodge moKamanjab moshitukulwa shaKunene ndele ta ponokelwa keembudi Etitano odo vati de mu kufila oshitenda noku mu denga olutu alishe. Konima eshi a dengwa vati eembudi ode mu kufa eelinga mbali, omafano okufaneka, omapando aheyali eenghaku doshikainhu, eengodi nhatu oshoyo oimaliwa N$ N$5 000.

 Omulumenu ina tumbulwa kedina weedula 34 okwa lopotwa a vakwa oinima i na ongushu yeedola N$59 8000 mOtjomuise moshitukulwa shaKhomas, konima eshi a kufilwa ondjebo komufekelwa ndele te i mu ulike fiyo a mana okuvaka omaliko oshihakanwa.

Moiningwanima aishe ei kamu na omufeekelwa a tulwa moipandeko nomakonaakono opolifi oku li metifa taa pula komesho.

Ovalumenhu vavali veedula 33 aveshe ova tulwa moipandeko kopolifi konima eshi ve livakela mofaalama Elim i li moshitukulwa shaHardap ndele tava dipaya mo eedi di li heyali. Opolifi oya hokolola kutya eedi oda kosha ongushu N$14 000. Opolifi oya hokolola yoo kutya oya kendabala okumona po omitwe di li hamano, omakondo e li 22 oshoyo omaxuli nomapunga.

 Moiningwanima ikwao omwa lopotwa ovalumenhu vavali veedula 31 oshoyo 29 va kwatelwa mOtavi moshitukulwa shaTjozondjupa konima eshi va hangika ve na eeshako nhatu di na eedingu dombelela yofino dihe na eembapila. Opolifi oya yelifa kutya ombelela oya hangika motuwa itoka yoToyota oyo yadidilikwa kovafaalama i na omalinyengo a limbililika nokonima ovanafaalama ova yelifila opolifi.