ONGWEDIVA - Mayola waShakati moshitukulwa shaShana Leonard Hango okwa ninga eshiivifo lopashiwana li na sha nomauliko opaipindi, oo e na sha nomapata Ovawambo a yooloka oshivike sha dja ko mOshakati. Omauliko aa otaa ka kala ko  mupDesemba 2023.

Hango okwa tumbula kutya omauliko opaipindi nopamufyuuluwakalo okwa ninga eedula da fika punhatu inaa ningwa molwocorona virus. Okwa weda po yoo kutya ova konga ondunge yokuninga ouvalelo wonomhenawina opo va dule okwoongela oshimaliwa momafiku 30 Sepetemba 2023. Okwa twikila ko yoo kutya omauliko opaipindi otaa ka ningwa mo 04-10 Desemba 2023 kokapale kakula kaShakati. “Eululo lopashiwana ola teelelika li ka ningwe mo 06 Desemba 2023. 

 Ovanhu vahapu kava li lela hava holoka komauliko aa eshi opo a tameka okuningwa nokonima eshi a ka kala taa ningwa keshe odula, ovanhu vahapu ova ka kala ve na ohokwe nova kala hava holoka momwaalu muhapu. Hango okwa weda po yoo kutya omufyuululwa kalo oshiima shakula moshiwana, nomauliko opaipindi ohaa dana onghandangala unene ngee tashi ya pokuhanganifa ovanhu, nokushiiva oinima ihapu yopamufyuululwakalo. Hango okwa tumbula kutya okwa teelela ovanangeshefa vomaludi a yooloka va ka kale va fika opo va dule okulandifa. “Omauliko aa otaa ka kala awa nokuyadi oinima ihapu tai longo ovanyasha shihapu sha nyika omufyuululwakalo,” Hango ta weda po.  

Elenga lakula laUkwambi Ndilimani Iipumbu oo naye a li poshivilo eshi, okwa tumbula kutya omifyuululwakalo oda dengelwa pedu pefimbo loukoloni. Okwa weda po yoo kutya konima yemanguluko ovanhu vahapu ova mona omhito opo va kale nokutyapula omifyuululwakalo davo va manguluka.

Iipumbu okwa twikila nokutya oivilo yoludi eli oya fimana shaashi ovanhu vomapata a yooloka ohava ongala opo va dule okushiivafana nokutunga oukumwe nomapata a yooloka.