Taimi Haihambo

ONGWEDIVA - Oitukulwa aishe ine konooli, oi li monghuo i na  onghambe omolwoshikukuta kwa teelelelwa shi ka kale sha nyaa komunhu. 

Ouyelele wa yandjwa kovaleli moshitukulwa shaHangwena, Oshana, Oshikoto nOmusati, oshikukuta inaku teelelwa shi ka kale sha kwata ashike ovanhu, ashike okuniwe elikwatopomutima kutya otashi  dulika vahapu va ka kanife oimuna yavo. 

Omunashipundi welelo lopashitukulwa mOhangwena, Erikson Ndawanifwa, okwa kundaneka kutya oshikukuta okwa teelelwa shi ka kwate oshitukukulwa ashishe noka ku wetike tashi ka fiya ko omukunda ile onhele yonhumba shaashi eshi shi li kOnghumbi osho ngaho shili kEvale.

“Omaumbo aeshe a kwatwa koshikukuta okwa tofwa mo, nouyelele ou owa twalwa kombelewa yOmupilima opo va dule okutala kutya otava yandje omakwafo ngahelipi,” Ndwanifwa ta tumbula. 

Omunashipundi okwa weda po kutya oshikukuta otashi ka pewa ovanhu aveshe, honyangadala ile iho nyangadala. Ta ti okwa didilikwa kutya ovanhu ava hava nyangadala, navo ohava nane noudjuu shaashi omaumbo amwe okuyadi unene ovanhu tava filwa oshisho. 

Ngoloneya waShana Elia Irimari okwa kundaneka kutya ovanhu vahapu moshitukulwa shaye ova teka omukumo shaashi inava teelela vali okumona mo sha momapya avo. Ta ti ovanhu vamwe nokuli ova undulila oimuna momapya, va tameka nale okulifa po oilya oyo ya li ya mena shaashi kape na eteelelo leteyo. Vamwe ova tameka nale okutembula oimuna yavo opo va dule okukonga oulifilo uwa. “Keshe shimwe osha kukuta,” Irimari ta tumbula. “Ovanhu neudo ava tava mono mo, shapo omakunde neefukwa, opuwo,” ngoloneya ta weda po. Epangelo otali kufa ashike ombinga mokuyambidida noshikukuta ngeenge omwaalu wovanhu aveshe ovo tava mono oixuna koshikukuta wa wana po. “Oikulya oya ninga ondilo, ovanhu otava xupu noudjuu,” Irimari ta tumbula.

“Oshikukuta osha kwata oshitopolwa ashishe shanooli, kape na omukumo wokuteya apa,” omupopiliko woshitopolwa shaShikoto Petrus Nehale ta ti. Nehale okwa weda po kutya neudo itaku ka teywa naanaa oilya, enhota ola tameka nale moikandjohoololo imwe. 

Ashike okwa kundaneka kutya
ombelewa yavo onghee ye lixulile okupewa oikulya yoshikukuta mo2019 fiyo oneudo kape na oikulya yoshikukuta ya pewa ombelewa yavo. Omupopiliko ou okwa tumbula yoo kutya ombelewa oya ongela po okamaliwa kokuyambidida omikundu dombaadilila manga ya teelela oikulya yoshikukuta keembonge depangelo. Nehale okwa kunghilila ovakwashiwana kutya inashi sholola osheshi ombelelwa yangoloneya oye lilongekida okuvatela apa tai dulu.

Omunashipundi wokomitiye kelelo lopashitukulwa shaMusati Andreas Shintama okwa holola kutya Omusati nao owa palamenwa koshikukuta ngaashi naanaa moitukulwa ikwao monooli. 

Shito mOmusati ohamu kala ashike oikandjohoololo i li itano oyo hai pewa oshikukuta. Ashike neudo okandjohoololo ikwao inya iheyali nayo oya kwatelwa mo momwaalu ou tau pewa oshikukuta. 

Oshitopolwa osha ninga onghendabala opo shi dule okutofa mo omaumbo aeshe oo a kwatwa koshikukuta opo a dule okumona evatelo loikulya. “Ohatu pula evatelo kukeshe tuu oo ta dulu okukufa ombinga opo e tu yambidide mokupa ovakwashiwana vetu oikulya,” Shintama ta tumbula.