Easy access at the tip of your fingers, subscribe to our daily ePaper version of our New Era Newspaper.
Home / Oshikumungu shEkuthomo lyIivalelo yAakiintu ye na oHIV/AIDS
Oshikumungu shEkuthomo lyIivalelo yAakiintu ye na oHIV/AIDS
2008-02-22Staff Report 2 "WINDHOEK Oshikumungu shetandomo lyiivalelo yaakiintu aagundjuka inashi za kehalo lyawo mboka taya lumbu nombuto yoHIV osha shongo omahangano gaakiintu gopaigwana ge nasha nuuthemba womuntu ge ye moNamibia okuninga omapekapeko gopamalolelo shi nasha nomikalo dhoka. Omahangano gane mwa kwatelwa Athena, World-wide Young Association, noIPAS South Africa okwa li ga kwatathana noshitayi shehangano lyopaigwana lyaakiintu mboka taya lumbu nombuto yoHIV moNamibia (International Community of Women Living with HIV - ICW) konima sho ya lesha moshifo shika oshiwike sha zi ko shi nasha netandomo lyiivalelo yaakiintu taya lumbu nombuto shaa shi pahalo lyawo tashi ningwa komahala galwe guundjolowele moshilongo. Omuunganeki goICW Namibia, Jennifer Gatsi-Mallet okwa kundaneke oshifo shika kutya omahangano gamwe oga uva oshinima shika moSouth Africa, ihe sho ga lesha ishewe oolopota dha faathana moNamibia, oya tokola oku ya ya ninge omapekapeko gomalolelo muka. Gatsi-Mallet ota ti omahangano pamwe noICW Namibia otaga ka tala kushoka tashi vulu okuningwa po. ""Otatu ka pumbwa okuya moshigwana nokuninga omapekapeko,"" osho a yelitha ta gwedha ko kutya ehangano otali ka thaneka po ondunge yiilonga nkene tayi ka enda. Pokati mpoka, aakiintu yaali oya dhengele ongodhi koshifo shika opo ya popye nokuhokolola nkene ya kuthwa iivalelo shaa li pahalo lyawo. Oshifo osha yi moonkundathana nomunamimvo 42 ngoka kwa li e na okumona okanona pakutandwa. Okwa li aniwa a lombwelwa kutya ota vulu ashike okutandwa a mone okanona ke ngele okwa zimine okukuthwa oshivalelo. Omukiintu ngoka pethimbo ndyoka kwa li e na oomvula 33 nokwa hokanwa, ota ti, ""Ngame onda li pomimvo dhokumona uunona."" Ota ti okwa li e na etegelelo lyoomwedhi ne sho a konakonwa kundohotola kutya oku na omukithi gwokankela, nandohotola okwe mu lombwele kutya ota vulu ashike okukala nomwenyo oomwedhi ne. Okwa li a tandwa eti 21 Juni 1999 mOshipangelo Oshinene shEpangelo shaVenduka. ""Ye (ndohotola) okwa lombwele ndje kutya otaya ka kutha mo etegelelo ndele taya ka tuma ndje ishewe ndi ka konakonwe oHIV. Onda monika ndika ombuto,"" meme nguka ta hokolola. Shaashi pethimbo ndyoka kape na omiti dhepango (anti-retroviral), meme nguka ota ti okwa kambadhala okuninga shoka kwa li ta vulu okuninga opo a kaleke ohanona ye nomwenyo sigo ethimbo lyokupulumutha lya thikana. Konima okwa ka lombwelwa kutya oku na ashike okukuthwa oshivalelo oshoka, ""ota ka sa ashike naka pe na ngoka ta ka tekula uunona we."" ""Okwa li nda pewa esiku lyahugunina ndi tokole. Ngele owa hala okutandwa u mone okanona, nena ou na tango okukuthwa oshivalelo. Ngame onda zimine oshoka ka pwa li we ompito yimwe,"" omukiintu ta ti. Ota ti shika osha ningwa omanga omusamane gwe a li pondje yoshilongo niilonga, nomokugaluka okwa li a hala okumona uunona owundji, ihe ye (omukiintu) ina vula we okumona uunona. " 2008-02-22Staff Report 2
