Hilma Nakanduungile

ELUNDU - Ominista yiikwameni negameno lyokoongamba, omundohotola Albert Kawana okwa patulula etulomiilonga lyetungo lyoshitayi shopolisi pElundu, moshitopolwahogololo Omundaungilo mOhangwena oshiwike shika. 

Sho a popi poshituthi shetulomiilonga, Kawana okwa ti, Elundu olimwepo lyomomahala ngoka ge na ondjokonona yi ikalekelwa ngele tashi ya  kekondjelomanguluko lyaNamibia, molwaashoka opwa lwilwa omalugodhi ogendji pethimbo lyekondjelomanguluko.

Ta gwedha ko ta ti, epangelo otali tsikile nokukwashilipaleka kutya olya eta omayakulo ga yoolokathana popepi noshigwana,

Mwaambyoka tayi ka tungwa omwa kwatelwa ombelewa yomayakulilo, omuhandjo gwoondunda dhokulala dhi li 14, ootenga dhomeya nosho wo olusheno. 

“Etungo lyopolisi ngaashi ndi tali ka tungwa mpano olyo endhindhiliko kutya epangelo otali tula miilonga omauvaneko galyo gokweeta omayakulo popepi noshigwana. 

Ashike nando oongeyi, onda yematekwa unene noonkondo keindjipalo lyomwaalu gwiimbuluma moshilongo, unene tuu tayi ningilwa oomeme nuunona,” Kawana ta ti ngaaka. 

Ta indile wo Aanamibia opo ya kwashilipaleke kutya ondjokonona yekondjelomanguluko oya gongelwa nokungongwa nawa, yi vule okulongithwa komapipi tage ya. 

Moshipopiwa sha leshwa pehala lye, ngoloneya gwaHangwena Walde Ndevashiya okwa ti, oshitopolwa she osho oshitiyali, sha landula oKhomas ngele tashi ya komwaalu gwiimbuluma yi li pombanda moshilongo, nomolwashoka okutunga omahala gomayakulo gopolisi  otashi kwathele okukaleka po ompango nelandulathano, nosho wo okulwitha iimbuluma.

“Nuumvo awike, opolisi moshitopolwa shetu oya ndhindhilika iipotha yomaludhi ga yoolokathana yi li 7 578. 

Opo ku lwithwe iimbuluma, otashi pula opo aapolisi ya kale ye na iikwa niipangitho yi li nawa, mwa kwatelwa nomahala mpoka taya longele,” Ndevashiya ta ti ngaaka.

Omahangano ngaashi Swakop Uranium, Pupkewitz Megabuild, Cheetah nOhorongo Cement oga yambidhidha niitungithi ya yoolokathana.