OMPUNDJA - Aakalimo yomoshikandjohogololo Ompundja oya dhimbulukwa nokusimaneka omuthigululwakalo mehuliloshiwike posikola Dr Chief Samuel Ankama moshitopolwa shaShana.

Kansela gwoshikandjohogololo shOmpundja Adolf Hitler Uunona okwa fatulula kutya otaya dhimbulukwa nokusimaneka oshowo okutumbaleka omuthigululwakalo opamwe naanona  osikola opo yu uve ko noya tseye kutya omuthigulwakalo oshike. Omuthigululwakalo ogo omaukwatya gomuhoko gontumba, gwi ikwatelela kelaka, eitaalo nomayihumbato gawo, iikulya,  omizalo, iiyimbo nosho tuu,” ta fatulula ngaaka. Ta popi ta ti aantu moshigwana oye na omithigululwakalo dha yooloka nonando yimwe yomuyo ya faathana. “Omuthigululwakalo oshinima sha simana kOmunamibia kehe, oshoka otagu dhana onkandangala onene momulandu gwopambepo, okuya pamwe nokutseyathana, taya igililathana nokuulikilathana ongushu yomithigululwakalo dhawo,” ta popi ngaaka. Ta popopi ta ti, Namibia omuyamba pamuthigululwakalo, e na omaudhano ga yooloka, iihongomwa, oomusika, omaimbilo, iikulya, omagumbo nomizalo dha yoolokathana, ngaashi naanaa dhu ulikwa esiku ndyoka. Secilia Shiyangeni ngoka a li ta landitha iikulya yOshiwambo ya yolooka okwa kumagidha ta ti omuthigululwakalo nagu simanekwe. “Omuthigululwakalo ogwo omulilo gwoshilongo,’’ ta popi ngaaka. Ta hokolola ta ti, oha landithi iikulya yoludhi kehe, ngele tashi ya kiikulya yOshiwambo. Ta ti ongeshefa ye okwe yi tala ko ya simana oshoka oya yooloka koongeshefa odhindji tadhi ningwa kAanamibia aakwawo.

“Aashona yomutse hatu landitha iikulya yOshiwambo, yamwe otaya ti kaye na omukumo gokulanditha ekaka, nenge omakunde gondulu,” ta popi ngaaka. Ta popi ta ti Aanamibia ngeno okwa li haya simaneke nokukaleka po omuthigilwakalo gwawo ngeno otaya ningi aayamba. “Ndhika onde dhi popi oshoka ondi wete oshilongo shetu tashi tekauka po esiku nesiku, tse Aanamibia ohatu kwatwa ko nokufuuka kwaambi yokondje yoshilongo shetu, tse tatu ekelehi omuthigululwakalo gwetu, shoka she tu fala monkalo ombwiinayi yi li ngeyi nena,” Shiyangeni ta fatulula ngaaka.

vkaapanda@nepc.com.na