Ovakwashiwana momukunda Ohashipepe moshikandjohoololo shEengodi vati otava vake po oilya nomakunde poipale.

Momukunda Oshihapepe moshitukulwa shaShikoto omwa lopotwa omukainhu weedula 32 e lininga kalyamupombo wokuvaka oilya yovanhu yoipale. Otaku hokololwa kutya omukainhu ou okwa vaka oilya nomakunde poshipale meumbo laLusia Andreas mexuliloshivike efimbo loufiku.

Andreas mwene weumbo okwa hokolola ta ti omufekelwa oha di pomukunda wavo nokwa kala alushe a kunghula poshipale shaye ta ninge omapekapeko. “Omukainhu oo okwa vaka po omakunde ayeshe poshipale ndele te e ka holeka meumbo lovakulunhu vaye li li pomukunda wetu,” ta ti.

Okwa hokolola ta ti okwa yongola oilya yaye efimbo longula eshi kwa sha nokonima okwa landula eemhadi domufekelwa fiyo omeumbo lavo.

“Omufekelwa okwa enda a fa ondoongi molwaashi eemhadi daye okwa li tadi monika da fa omakondo ondoongi,” ta ti.

Kansela woshikandjohoololo Eengodi Protasius Neshuku okwa kumaida oshiwana opo shi kale alushe sha kotokela omakunde noilya yavo poipale molwaashi ovanhu paife ove lininga ookalyamupumbo. Neshuku okwa ti oshiwana nashi ka konge omakwafo oikulya cavatina shavo ndele haku vaka po oilya yovanhu ve i longa noudjuu. fhamalwa@nepc,com.na