Festus Hamalwa

Omukulunhu wopolifi moshitukulwa shaMusati Komufala Ismael Basson okwa kumaida ovadali opo va xulife po okutula omavela omeva poluhayela noshoyo okufiya ounona momaumbo vehe na omutonateli.

Okwa hokolola ta ti okwa didilikwa ounona va ninga oihakanwa okuwila momavela omeva, omavela oshikundu noshoyo momatale omeva nomomifima.

Onghee okwa ti osha fimana opo ovadali va kaleke po eameno lounona vaha ninge oihakanwa yokufila momeva. Mexuliloshivike mOmusati omwa lopotwa okaana kokamati keedula mbali ka xulifa konima eshi ka wila momufima womeva u li popepi neumbo lavo momukunda Okapuku.

Nakufya okwa tongololwa oye Johannes Johannes omukalimo womOkapuku.

Otaku hokololwa kutya okaana aka okwa li ka fiwa meumbo nokaana kakwao keedula nhee pefimbo inakulu kwa li a ka denga oikombo mepya.

Vati okudja opo okaana oke livaka mo meumbo nokuya komufima womeva nokonima yefimbo oke lituwa kuinakulu ke li momeva ka fya.

Basson okwa ti oshiwana nashi kwashilipaleke kutya ounona otava fiwa meumbo nomutonateli efimbo keshe.

Okwa weda po ta ti oshiwana nashi kale alushe tashi tataa ounona ngeenge tava lifile popepi nomatale omeva.

fhamalwa@nepc.com.na