Omupopiliko woshitukulwa shaHangwena Silas Nepembe okwa kunghilila oshiwana mOhangwena opo shi xulife po okulya eeshi defundja molwaashi otaku fekelwa di na omufiki. 

Nepembe okwa ti oshivike sha djako momukunda Omufitu waNakashole omwa monika eeshi defundja di na oipute osho tashi ulike kutya eeshi oda kwatwa komufiki. 

Onghee okwa ti osha nyika oshiponga okulya eeshi edi shaashi kaku shivike naanaa kutya oshike she di lya. Ta ti oshietifi osho otashi dulu okukala sha nyika oshiponga koshiwana. Neudo moitukulwa yokonooli, unene mOhangwena nomOshana omwa lopotwa omeva efundja a dja moAngola omo kwa li omikunda dihapu da dengwa kefundja. 

Omeva efundja paife otaa ende taa pwinine, naashi osha eta opo eeshi di ye popepi novanhu. 

Eshi osha yandja omhito kuvahapu, unene ovanyasha, ovo va kala tava palula ovakwanedimo vavo, voo tava landifa nokulimonena mo ofilinga. 

Ashike paife oshiwana osha pumbwa okuteelela opo ku ningwe omakonaakono opo ku talike kutya oshike sha eta efyo leeshi, nongeenge otadi dulu tuu okuliwa kovanhu. 

“Oshiwana nashi ka kale tashi paafana ouyelele ngeenge shi li peenhele da yooloka mwa kwatelwa eendingosho, opo shiha lande eeshi defundja. Ovakulupe nava pewe ouyelele opo navo vaha lande eeshi defundja keenhele dokukwatela opendjela,” Nepembe ta ti. Okwa weda po ta ti oshiwana nashi lopotele yoo oovene vomikunda ile eembelewa dookansela kombinga yovanhu tava kwata eeshi defundja molwaashi inadi pitikwa vali okuliwa. 

Es h i a kwat a f ana naKundana, omunambelewa woshikondo shokulonga nomikifi deeshi mouministeli weeshi needjo nomefuta Elizabetha Ndivayele okwa ti ouministeli wavo owe lipyakidila okukala wa ningila eeshi odo omakonakono. 

“Otwa tameka nale okuya moshitukulwa shaHangwena opo tu ninge omakonaakono e lixwa po nokuyandja ouyelele moshiwana kombinga yeeshi odo,” Ndivayele ta ti. 

Okwa ti oshiwana otashi ka shivifilwa konima ngeenge omakonakono okwa pu kutya eeshi edi otadi dulu okutamekwa okuliwa naini. 

fhamalwa@nepc.com.na