ONGWEDIVA - Kakukutu kopolifi Inspekta General Joseph Shikongo okwa ti Ovanamibia ove lihumbata nawa oule womafiku 21 pefimbo lokulila Omupresidente Hage Geingob.
“Kape na oimbuluma youmbudi ya lopotwa pefimbo leefya unene tuu moshilandopangelo,” ta ti.
Okwa weda po ta ti kape ovanhu va lopotwa ve lidenga mumwe ile ovanhu tava ningi omakangha pefimbo leefya daGeingob.
Onghee okwa pandula oshiwana eshi sha ulika efano liwa kovaenda kwa li ve ya keefya. Omupresidente Geingob okwa xulifa momafiku 4 Febuluali nokwa fudikwa Osoondaxa shomafiku 25 omwedi ou komaendo omapendafula oHeroes Acre moWindhoek.
Kakukutu kopolifi okwa pandula yoo vali ovaleli veengudu da yooloka dopapolitika eshi va kaleka manga oikonga yavo yopapolitika mokuyandja efimaneko kOmupresidente Geingob.
Onghee okwa ti nonande kwa lopotwa ovanhu vamwe kwa li va hala okuninga omakangha pefimbo leefya daGeingob, opolifi oya kwashipaleka kutya otai tula po omilandu.
Shikongo okwa ti ookalyamupombo navo okwa li va nyika oluhodi okulila Geingob molwaashi kape na oshimbuluma shoumbudi sha lopotwa, ta ti eshi itashi ti kutya eshi Geingob a fudikwa nava twikile noumbudi. “Inandi mona olopota ya dilila koitukulwa ile moshilandopangelo kombinga yovanhu itave lihumbata nawa koivilodimbuluko yokuyandja efimaneko kuGeingob.
Onghee keenhele da yooloka adishe okwa li ku na opolifi nelalakano lokutula po eameno loshiwana nelandulafano,” Shikongo ta hokolola. Okwa weda po ta ti kape na omunhu a lopotwa a humbata oshilwifo ile ta ningile ovanhu omatilifo pefimbo lefyo lomutwe woshilongo.
Shikongo okwa ti oshiwana osha longifa nawa eendjila okudja koitukulwa ya yooloka noshoyo ovakalimo vomoWindhoek unene pefimbo oshilandopangelo kwa li shi yadi ovaenda.
Onghee okwa ti kape na omunhu a dja kondje yoshilongo a longelwa omunyonena woumbudi.
Lwopokati opo, Shikongo okwa ti neudo oku na omahoololo onghee okwa kumaida eengudu dopapolitika opo di liufe komilandu.
“Na tukaleni nombili Ovanamibia tuna oukumwe nelongelokumwe ngaashi naana Omupresidente Geingob kwa li e hole ombili,” ta ti.
Omupresidente Nangolo Mbumba naye okwa ti okwa pandula Ovanamibia eshi va kala nombili pehe na omalipumomumwe pefimbo lokulila Geingob.
Onghee okwa kumaida oshiwana opo shi twikile okukala shi na oukumwe nokukaleka po ombili moshilongo.