Eshi outalala tau xweenene, oshiwana shovayelele kOkongo nOmundaungilo osha ninga efiku otashi nane nonhatu molwaashi ka shi na oikumbafa neembidja.
Ovakulupe nounona ovo unene va ninga oihakanwa youtalala, nava mwe vati ova yokukwatwa koshidu.
Pefimbo Kundana a talela po omukunda Omalalapapa moshikandjohoololo shaMundaungilo, ovakwashiwana ava hokolola tava ti ove li moluhepo noshimaliwa shokulanda oikumbafa.
Vamwe ohava nangala pedu momapundo a dikwa noixwa neenailona omanga vamwe ohava nangala koshi yomiti va tema ko omindilo.
Omukulunhu womapundo Helaria Haule weedula 86 okwa hokolola ta ti omafimbo amwe ohava ningi eenghendabala dokutema omindilo momapundo avo opo mu kale mwa pupyala.
“Ondi na ovatekulu vanini hava nangala ashike vehe na eembidja doutalala.
Ovatekulu vange ohava nangala ve li xwena mumwe opo vaha dengwe koutalala ashike ihashi kwafa sha molwashi outalala owa pimbila,” Haule ta ti.
Haule okwa ti nonande ye oha kwata opendjela, oshimaliwa ina shiwana okuvayambidida meumbo.
Ta ti oku na ovatekulu va hetatu ovo aveshe hava xupu mokamaliwa kaye kopendjela.
Naango Shimalimwati e na ounona vatano mwa kwatelwa okaana kodula imwe okwa pula epangelo opo li talele po pomapundo avo nokukala la tala onghalo omo veli.
Ta ti otava mono oixuna kondjala noluhepo.
Ta ti ngeenge umwe womuvo a kwatwa komukifi, nena epundo alishe ohali pu ko shaashi outalala ohau va fininike op ova nangele aveshe veli xwina mumwe.
“Ngaashi paide otwa kwatwa komukifi wonghana, ashike katu nanghee. Ohatu nangala ashike tu li mumwe –naavo va kwatwa, naavo itava ehema.
Paife atushe otwa pwa ko. Vali, fye otu li momhumbwe yoikulya.
Onghee ohatu indile epangelo li tu tumine oikumbafa, omatalashe noikulya,” ta ti.
Okwa weda po ta ti ove na yoo vali omhito yoku lika keendje nomayoka molwashi ohava nangala pedu momapundo.
“Ounona vange ohava kala ashike tava ka kama koutalala molwashi vehe na sha oikutu. Vali, ounona vetu paife ova kwatwa komanyutu, molwa omhumbwe yoikulya,” Shilimwati ta ti.
fhamalwa@nepc.com.na