ONGWEDIVA-Ngoloneya woshitukulwa shaHangwena Walde Ndevashiya ota ti ota lundilwa mokakwatanawi katandavela moshiwana kutya oye xe younona vaEva Leena Kalimbo oo a kutulwa omunino kuxe younona vaye oku pendukila Osoondaxa.
Okakwatamawi taka tambulafanwa kosocial media otaka ti Laurence Kapule Ndaoya (43) okwa dipaa omukainhu waye konima yoidjemo yoDNA oyo ya holola kutya haye xe younona vavali ovo va kala tava tekula naKalimbo. Ndaoya vati okwa tokola oku ninga omakonaakono shaashi a uda omitoto kutya ounona vavali voukadona ovo ha ti ova ye ovaNdevashiya. Okaana kamwe oke na eedula heyali omanga nakakwao odula imwe neemwedi hamhano.
Ashike Ndevashiya okwa ti ye haye xe younona ovo, ovanhu otava kakeke edina laye, nokape na oshidjemo shoDNA osho tashi ulike kutya oye xe younona.
Eshi a ya meenghundafana naNew Era Ndevashiya okwa koleka kutya okwali shili mekwatafano lopaihole naKalimbo ashike oule ashike sokafimbo kaxupi mo2017.
“Okudja opo [Kalimbo] okwa ya koWindhoek ashike ina ndi kala vali ndi li mekwatafano naye,” ta ti.
Ndevashiya ta ti mo2021 Kalimbo okwa alukila mEenhana noku mu pula ekwafo loshimaliwa opo a ka tote ongeshefa yaye. Ta ti okwe mu kwafele oshimaliwa ashike eshi ine shi ninga shaashi a hala okukala naye paihole.
“Paife ovanhu otava lundile nge kutya ame xe younona. Ka pena ouyelele tau ulike kutya ounona ovange. Ina ndi ya koDNA nounona ovo onghee oshike tashi ulike kutya ounona vange?” Ndevashiya ta pula.
Okwa holola yoo kutya okwali ha tuminwa omwatulaka nokudengelwa eengodi kuNdaoya te mu lombwele kutya ina ya vali nomukainhu waye.
“Ndaoya okwa kala yoo vali a dengele omukulukadi wange te mu lombwele kutya ondi na ekwatafano nomukainhu waye…” ta ti.
Ashike Ndevashiya okwa ti ye okwa li ashike a kwafela omukainhu ou, onga omuleli, nefimbo alishe olo Ndaoyo ta denge eengodi noku ya kopolifi, ekwatafano lavo naKalimbo ola hangwa la xula nale.
Okwa ti ke udite ombili kombinga yoshikumungu eshi molwashi paife ouyelele owe li hanena komalungula noshoyo modoolopa yaEenhana kutya oye xe younona, nomolwaashi taka twala moihokolola keshe ou ta kakeke edina laye opo e li yeleke.
Ngoloneya okwa ulika yoo omunwe kovatoolinghuna ovo ta ti ova tumwa nelalakano lokukakeka edina laye opo a kanife oilonga.
“Ame omushaname nda hombola ndi na ounona. Ame omuleli wopapolitika handi kala komesho yovanhu onghee itashi ulike efano liwa eshi ovanhu tava kakeke edina lange,” Ndavashiya ta ti.
Ndaoya weedula 42 naye okwa fya Osoondaxa eshi a ya shwa kovapolifi pefimbo kwa li vati ta kendabala okulwifa ovapolifi e kwete ondjebo nombele.
Eshi a kwatafana naKundana omukulunhu koshikondo shokukonakona oimbuluma, omupedu Commissioner Zachariah Amakali okwa ti epangelo ola patulula oshibofa opo ku ningwe omakonakono kombinga yovapolifi ovo kwa li tava longo pefimbo Ndaoya a yashwa.
“Ota ku ningwa omakonakono opo ku talike kutya olye a ya sha Ndaoya,” ta ti.