ETAMBO - Ounona vavali voukadona mOndangwa otava hepekwa keemhepo da nyata odo vati tadi va undula ve limangeleke, okuenda va fa omayoka nokukupulashi omaliko meumbo.
Omolweemhepo edi, ounona ava aveshe ve na eedula 13, nohava kala nainakulu molukanda Etambo modoolopa yaNdangwa ova fiya po ofikola.
Pefimbo Kundana a talela po eumbo lavo Etitatu, inakulu younona Hileni Uuyuni okwa hokolola ta ti okaana kamwe oka tameka okukwatwa komhepo yokulimangeleka momudo 2021 konima eshi xe a xulifa omanga kamwe oka tameka neudo.
Okwa hokolola ta ti okaana kamwe oka dalwa komonamati omanga kamwe oka dalwa komonakadona.
Okwa ti ounona ohava popi ondaka yomukainhu tai va lombwele ve ke limangeleka nokukupulashi omaliko omeumbo. Okwa weda po ta ti ondaka yomukainhu ha popi mounona ove mu shi nawa. “Paife ohatu kala alushe twa pata po peumbo nokukwashipaleka kutya oinima ya nyika oshiponga ngaashi eembele otwe i holeka. Ngeenge peumbo opa patululwa ounona ohava di mo tava lotoka tava kongo eengodi va hala okulimangeleka,” ta hokolola.
Uuyuni okwa hokolola ta ti omwedi wa dja ko okaana kamwe oka tulwa pombada yoipeleki kuwalye efimbo loufiku.
“Otwa uda ashike Ndilimeke ta popi pombada yeumbo. Efimbo olo okwa li twa kofa.
Okudja opo otwa ninga eenghendabala opo a dje ko kombada,” ta ti.
Okwa weda po ta ti ounona ohava pimbile neenghono efimbo loufiku. “Otwa kendabalala eengeleka doiveva, otwa kendabala eendudu ashike kape na elunduluko la sha. Namwene womukunda wetu onde mu shivifila kombinga yoshikumungu eshi,” ta hokolola.
Onghee okwa ti ovatekulu vaye otava mono oixuna shaashi kave na efiku ina va xulifa.
“Ngeenge hatu va kelele vehe li mangeleke ohatu dengwa kounona ve kwete eembiya. Ohatu kondjo nounona shaashi momalutu avo oha mu kala muna omhepo i va kwe tele komesho,” ta ti.
Uuyuni okwa hokolola ta ti ounona ohava li unene oikulya ihapu osho tashi ulike kutya momalutu avo omu na ovanhu vavali.
“Otu li moudjuu molwaashi ihatu kofa vali. Oufiku oushe ohatu kelele ashike ounona vehe limangeleke,” ta ti.
fhamalwa@nepc.com.na