Elelo lodoolopa yaNgwediva ola ongelaoshimaliwashomillionaN$1.3 kouvalelo wa li ko mexuliloshivike wa li kendiki lomaulikilo oipindi mOngwediva.
Oshimaliwa sha ongelwa osha nuninwa okulongifwa momaulikilo Ongwediva Annual Trade Fair (OATF) taa ka kala ko momafiku 25 Aguste fiyo omafiku 2 Sepetemba.
Omaulikilo oipindi neudo otaa ka kala ko lwoshikando oshi-22. Ovanangeshefa vanini novopokati nomahangano manene otava ka kufa ombinga. Ehangano lo-MTC olo limwe li li omuyambididi a kula womomaulikilo oipindi nola yambidida noshimaliwa N$385 000. Moshipopiwa shaye Tshali Iithete ou a li omupopi a fimana kouvalelo okwa ti omaulikilo oipindi okwa fimana molwaashi ohaa yambula po odoolopa tashi pitile mokueta po omayakulo opashiwana. Onghee okwa ti osha fimana opo eedoolopa di twikile nokuninga omaulikilo oipindi shaashi otashi eta oyuuyemo modoolopa. Iitheteokwatiomaulikilo oipindi otaa xwaxwameke ovanyasha va kale va mona omhito yokulandifa oilandifomwa yavo noshoyo okuyandja oilonga kovanyasha vakwao. “Omaulikilo oipindi otaa nane ovalandifi va yooloka okudja meni nokondje yoshilongo.
Onghee osha fimana opo elelo lodoolopa li kwashilipaleke kutya endiki lomaulikilo oipindi ola yela nawa nokukaleka po eameno opo ovalandifi va dja kondje yoshilongo va kale ve na ohokwe yokukufa ombinga yomaulikilo oipindi omomudo tau ya,” ta ti. Okwa kumaida oshiwana opo shi kale tashi yambidida omauliko oipindi molwaashi otashi tu ovalandifi omukumo va twikile nokulandifa.
Omupopiliko wehangano lo- MTC Erasmus Nekundi okwa ti ehangano lavo otali twikile nokuyambidida omaulikilo oipindi molwaashi oipindi otai yambula po odoolopa nokuyandja eemhito koshiwana shi kufe ombinga mokulandifa oilandifomwa yavo.
Nekundi okwa ti ehangano lavo ola kala nokuyambidida omaulikilo oipindi aNgwediva oule weedula 15 paife.
Mayola wodoolopa yaNgwediva Taarah Shalyefu okwa ti elelo lodoolopa yaNgwediva otali lalakaneneokuyambulapoodoolopa, okuyambula po ovanangeshefa noshoyo okulwifa ondjala noluhepo tashi pitile mokuninga omaulikilo oipindi.
fhamalwa@nepc.com.na