Ovakeleli vomaliko vavali vati ova ponokelwa nokunyekwa omaliko kovalunga vahamano mwa kwatelwa oshimaliwa shoN$24 624.50.
Oshiningwanima eshi osha ningwa Etivali efimbo longula modoolopa yaKaribib pofitola yoPep.
Omupopiliko wopolifi moshitukulwa Erongo Inspekta Ileni Shapumba okwa hokolola ta ti ovakeleli vomaliko ohava longo nokukufa oimaliwa meefitola noku i twala kombaanga.
Opolifi oya hokolola tai ti ovakeleli vomaliko okwa li hava ka tala oshimaliwa keembelewa dehangano Erongo Red.
Okudja opo vati ova nukilwa koolyamupombo ve kwete eembele neendjebo.
Otaku hokololwa kutya tete ovafekelwa ova nhukila omukeleli womaliko ou kwa li ta shingi otuwa noku mu nyeka ondjebo ndele tave mu denge moshipala.
Ovakaleli ova nyekwa oinima ya yooloka ngaashi eengodi davo dopeke, oimaliwa oyo kwa li va ka tala kehangano Erongo Red, needjebo.
Opolifi oya hokolola tai ti oye shi pondola okukwata ko oinima imwepo ngaashi eedjebo noshoyo eengodi davo dopeke, ashike oshimaliwa inashi monika.
Ovafekelwa vatatu ova kwatwa po omanga ovafekelwa vane ova faduka po.
Onghee opolifi otai indile moshiwana kwaau e na ouyelele kombinga yovafekelwa ava opo oshiwana shi lopotele opolifi keshe i li popepi.
Otaku hokololwa kutya ovafekelwa okwa li tava shingi eetuwa ngaashi oPolo itilyaana notuwa yoJetta itoka.
Eetuwa adishe oda hangika da kanghamekwa moixwa.
Oshiningwanima shikwao, ovakulupe vavali, omushamane weedula 87 nomukulukadi waye weedula 83 ova ponokelwa kookalyamupombo.
Oshiningwanima osha ningwa Etitatu efimbo lokeengulasha modoolopa yaSwakopmund keumbo lavo.
Ovakulupe ova ponokelwa kovalumenhu vane, nova nyekwa omaliko avo.
Opolifi oya ti ovakulupe inava monifwa oshiponga.
Oshiwana otashi indilwa okulongela kumwe nopolifi mokuyandja ouyelele kombinga yovafekelwa ava.
Lopokati opo, omulumenhu weedula 21 okwa kwatwa po eshi vati a dipaa kaume kaye nombele. Oshiningwanima osha ningwa mOmuthiya moshitukulwa shaShikoto.
Opolifi oya hokolola tai ti nakufya omulumenhu weedula 26 okwa tuwa nombele shaashi vati a tuka mukwao.
Omufekelwa ota holoka nena momhangu nota pangulilwa oshibofa shedipao.
fhamalwa@nepc.com.na