ONGWEDIVA- Ongudu yovayandji voumbangi komhangu ya mangestalata mOshakati oshivike shadja ko, ova holola eudo nai lavo omolwa oshimaliwa sholefa osho paife tashi yandjwa pamukalo mupe, oku pitila kowoe-wallet.
Vamwe vomongudu oyo tai nyenyeta ova hokolola kutya efiku olo ova ya komhangu pohetatu yongula ashike ova ka ka dja ko ashike ponhano yokomatango, shaashi vati oimaliwa yavo oya kwata efimbo lile okulopota keengodi davo.
Umwe womuvo okwa hokolola kutya inava panda omukalo mupe wokupewa oimaliwa ili momukalo woe-wallet shaashi voo kave shi okulesha. “Shimwe vali oimaliwa oya wila kongodi efimbo lokomatango fyee vamwe ohatu di komakule. Otwa tila neembudi,” umwe natango ta ti.
Vamwe vavali natango va pula vaha tumbulwe komadina ova hokolola kutya efiku vali vaka yandja oumbangi, oveli shunina komaumbo oimaliwa yavo ina i lopota keengodi.
“Otwa uhala ashike twa kalela omhangu fiyo hatu li tutu po kondjala nenhota. Efiku la landula natango otwa alukila komhangu tweya oku konga oimaliwa oyo,” umwe ta hokolola.
Ovakwashiwana ava natango ova nyenyeta kutya ohava i nounona vashona ava vaningilwa ominyonena kovafeekelwa ndele ohava uhala ashike vafya ondjala. “Eshi otashi etifa ovanhu vahapu va sholole okukala tava ka yandja oumbingi komhangu oshi tashi eta opo oibofa ipange inaipwa shaashi eembangi itadi hale vali okuholoka.
Omukulunhu womhangu ya mangestrata mOshakati Mwilima Mwilima okwa tumbula kutya omukalo mupe wokuyandja oshimaliwa okuvatela ashike ovakwashiwana shikale shipu ngeenge tashi ya pokuva pa oimaliwa yavo yolefa.
“Paemhito dimwe aame handi pumbwa okushaina eembapila davo ngeenge tava pewa oimaliwa yolefa, ashike momhangu ohandi dulu okukalamo efimbo handilongo noibofa ya yooloka. Eshi handi ka mana natango luhapu ohaku kala kwa toka. Okwali ndi wete omukalo wokufuta oshimaliwa pangodi, oo ihau pula vali ndika shaine eembapila uli xwepo,” Mwilima ta tumbula.