Max Henrich
ONGWEDIVA - Ovakulupe vavali, omusamane nomukulukadi waye, ova tonga kutya elelodoolopa laShakati ola hala oku va taataa meumbo lavo, vati va tembukile moshana osho hashi yada omeva pefimbo lodula.
Ndove Heita, 88, opamwe nomukulakadi waye Teofilia Shikongo, 98, ovatonga kutya voo ova tunga eumbo lavo nale mo 1968. Ova weda po kutya mo2014 elelo loolopa YaShakati ole va talela po nelalakano opo va tale ongushu yedu lavo va dule oku li landa po. Heita nomukulakadi waye ova pulwa va landife po edu eli, ashike inava lombwelwasha kutya ove na lela okuyuka peni.
Johaness Nghiloto oo e li omutekulu wovakulupe ava okwa tonga kutya elelodoolopa ola hala va tembukile moshana. Okwa weda po yoo kutya ovanhu ava tava pulwa va tembukile ponhele yavo, navo oku tava di otava tauka efundja shaashi okuyadi omeva. “Omolwashike inava hala oku tu fimaneka?” Nghiloto ta pula nelimbililo.
Ovakwenedimo ava ova popya kutya elelodoolopa ole va pa eembapila inadi shainwa doo inadi dengwa oihako okudilila kombelewa yavo. Ova weda po kutya ope na sha ngoo sha fa sha puka tashi monika inashi nyika ouyuuki. Ova tonga kutya, voo ove na ovashiinda opo ashike va tembukile popepi navo ndele voo ove na eembapila da yukilila da shainwa doo oda dengwa oihako.
Ova tonga kutya mo2021 elelodoolopa laShakati ola talela po eumbo laHeita, nova lombwela Heita kutya keshe tuu ou e na eumbo li li mepya omo ne li dikulule po shaashi onhele kai shi vali yavo. Omaumbo aa a li mepya okwa tungwa kovatekulu vaHeita yee oye kwa li e a yandja kovatekulu vaye.
Nghiloto okwa weda po yoo kutya, yee eshi a mona kutya eembapila edi va pewa kadi na ouyelele wa yukilila, ova pangela opo ve shi twale kombelewa yoOmbudsman. Kombelewa yOmbudsman ova lombwela kutya nava ye koministeli yomatalululo omadu, osho yo ouministeli wemona voo tava twaalele ombapila ei tai ulike kutya ova futwa shili.
Omunambelewa womauyelele melelodoolopa laShakati Katalina Kamari, okwa tonga kutya ngee elelodoolopa ola hala okulanda edu ponhele yonhumba ohava popi nawa namwene wonhele. Okwa weda po yoo kutya voo ihava dulu okutula omunhu ponhele itai nuwa omeva, ohava longo po tete nawa opo pu dule okudiwa. Okwa weda po yoo kutya ovanhu vahapu konima va futwa kave hole vali okudja po peenhele odo, vahapu ohave ya ashike nelalakano kutya edu ove li pewa onga omaano. “Shima nee ndele omunhu ina hala okulinyenga, oku na ashike okufuta oimaliwa inya a futilwe opo a dule okulandifa po onhele yaye,” Kamari ta weda po.