Omulumenhu weedula 34 okwa fya konima eshi vati a tuwa neembele kohonda yaye ikulu meumbo lavo pefimbo okwa li tava tanguna.
Nakufya okwa tongolwa oye Markus Whayne Ulrich omukalimo wOmomaruru.
Oshiningwanima osha ningwa mexuliloshivike kolukanda Sonskyn modoolopa Omaruru efimbo loufiku.
Omupopiliko wopolifi moshitukulwa Erongo Inspekta Ileni Shapumba okwa hokolola ta ti Ulrich okwa ya keumbo lomufekelwa nokutameka ta kondjele meumbo laye eshi ta lombwelwa kutya na dje mo.
Opolifi oya hokolola tai ti opo Ulrich okwa tameka okudenga omufekelwa neengonyo nomanghava moshipala.
Otaku hokololwa kutya omufekelwa eshi a loloka okudengwa okwa kufa ombele nokutwa Ulrich nokuxulifila ponhele opo.
Opolifi oya weda po tai ti nakufya okwa kala shito ha denge omufekelwa.
Nakufya nomufekelwa ove na okaana kamwe ashike ihava di meumbo limwe konima eshi kwa li va topoka.
Omufekelwa okwa kwatwa po nota hokoloka momhangu nena, ota pangulilwa oshibofa shedipao.
Omukainhu weedula 27 oku li modolongo konima eshi a kwatwa po molwaashi a dipaa omulumenhu waye nombele pefimbo kwa li tava teleke.
Oshingwanima osha ningwa molukanda Okapupona modoolopa yaPuwo efimbo lokonguloshi omwedi wa dja ko.
Omukainhu weedula 35 oku li modolongo molwaalshi a dipaa omulumenhu waye nehonga pefimbo kwa li tava tanguna meumbo lavo.
Oshiningwanima osha ningwa momwedi Apiilili momukunda Onaame moshitukulwa shaHangwena.
Opolifi oya kumaida ovaholafani opo va ka konge omakwafo kovaxungimwenyo ile kovafitaongalo ngeenge ve na omaupyakadi momakwatafano avo opaihole molwashi okudipaa kaku shi e kandulepo lomukundu.
Omakonakono opolifi otaa twikile moibofa aishe yovalumenhu va dipawa kovakainhu.