Ovamwenyeki vomangafifi momikalo danyooloka otava lili Martin Kambulu Nembia, a shiivika nedina DJ O’mzala.
Nembia okwa a xulifila onguloshi yEtitatu moshipangelo shaShakati mepipi leedula 57.
Okwa lumba noudu woudu wosuuka, oo wa etifa nokuli a tetwe okuulu.
Umwe womovapopepi naNembia, Remind Ekandjo, a shiivika nawa nedina DJ Remind, okwa ti Nembia odalele yaShakati, yee omo a kulila nokuputukila.
Ekandjo okwa ti Nembia ounghulungu wokunyenyepeka eengalo, hano ou-DJ okwe u tameka mutu meedula do80, omo a tameka okudj mee club dihapu dali mOshakati, nopefimbo opo oye ashike a li oDJ mOshakati aishe.
“Ohandi dimbuluka nokuli a ka tameka ta ende needoolopa dihapu moshilongo ta-dj, nokwa ka longela efimbo lile koClub Night i li kOranjemund oshoyo Club Thriller koWindhoek,” Ekandjo ta ti.
Okwa ti pefimbo olo Nembia ta nyenyepeke eengalo ye (Remind) ka li e na eshi. Okwa kala ashike he mu lambalala meekalaba oufiku fiyo te mu hongo.
“Onda kapapala ashike eshi naame handi ende handi shiiva. Ngeenge nokuli tu li mokalaba ndee ta di po, onda ka tameka oku kala handi shiki ko. Nena ohandi ti Nembia oye a patulila nge ondjila you-Dj, nomolwaye ovanhu ohava ifana nge DJ Remind,” ta hokolola. Okwa ti ooNembia ovo votete yoo natango okueta po opologalama hai ifanwa “Met Me” oyo vati kwa li hai kala ya nuninwa ounona vashona ava ihava dulu okukala meekalaba oufiku.
Ounona vati ova kala have ya kokalaba po12 womutenya voo tava shuna komaumbo pohamano yokomatango. Vati efimbo ve li mokalaba efimbo olo lomutenya, ohava kala kwa li tava ulikilwa nghee hashi kala ovanhu ngeenge ve li mokalaba oufiku, voo ava ve hole eengalo, oshoyo ve hole oilonga youDJ navo tava pewa omhito opo va dule okulihongelako.
“Ame onda dengwa pedu konghundana ei, ashike itandi dimbwa ependafule likwetu molweendonghahalamwenyo yange you-DJ,” Ekandjo ta ti.
Umwe womovakwapata Maria Ipwiikina okwa ti onghundana oya denga ovapambele pomitima, shaashi kappa li pe na ou eshi teelela.
Okwa ti Nembia okwa li omuidilili wovanhu kamana, yee okwa tekula ovanhu vahapu neenghono nokwa deula yoo eeDJ domonooli dihapu ngaashi oo DJ Punyati, ooMapeni nooDJ Remind.
Ipwiikina okwa ti Nembia okwa fiya ko ounona vavali okamati, nokakadona. Okwa yelifa yoo kutya omalandufano epako natango inaa tongwa shaashi onghundana oipe lela.