Ovanadolongo ovakainnhu 29 ova pita nokupewa eedjapo konima eshi va mana elihongo lavo mopologalama yedina Prisoner’s Journey kevyulonghalo laWindhoek oshivike sha dja ko.
Opologalama yoPrisoner’s Journey ihai yandje elongombiibeli kovanadolongo ve li momavyulonghalo opo ovanadolongo ve lidilulule nokukala ve na eudeko lombiibeli.
Omukulunhuwiliki noku li omufita kevyulonghalo koWindhoek Connie van der Colf okwa ti opologalama yotundimbiibeli otai lundulula okukalamwenyo kovanadolongo noku va pa omukumo wokukala ovaitaveli voshili.
“Opologalama otai kwafele ovanadolongo va kale ve na etilokalunga, vaha longe vali oimbuluma konima ngeenge ova mangululwa modolongo,” ta ti.
Onghee okwa yelifa ta ti eetundimbiibeli oda fimana komavyulonghalo notadi twikile.
Okwa weda po ta ti pefimbo lotundimbiibeli ovanadolongo ova kala hava shange omapulo oinyangadalwa nomakonakono.
Omukulunhu woshikondo sheedolongo moNamibia Commissioner General Raphael Hamunyela okwa ti ovanadolongo ohava pewa eetundi meepologalama da yooloka, mwa kwatelwa eetundi dokulihongela omaifano a yooloka.
Hamunyela okwa ti ngeenge omunhu e li modolongo itashi ti kutya ita dulu vali okukufa ombinga moinyangadalwa yofikola.
Onghee okwa ti omavyulonghalo otaa twikile okuyandja omadeulo meepologalama da yooloka kovanadolongo.
“Eetundi otadi kwafele ovanadolongo va kale ve na ounongo momaifano a yooloka. Otu na ovanadolongo hava longo momavyulonghalo konima eshi va pewa omadeulo ngaashi okulonga moikunino younamapya, okuteleka eemboloto nomashina nosho tuu,” Hamunyela ta ti.