ONGWEDIVA - Ovanadolongo vahamano va dilila keedolongo da yooloka otava kufa ombinga momafiyafano oNational Skills omo ovaihongi vomaifano oilonga yokomake tava ulike ounongo wavo.
Vamwe vomovanadolongo ava ovo Elifas Tobias ta longele omido o44 konima yekumba, naPatrick Gariseb omunamido (48) oo a pelwe ehandu lomido 10 konima yekumba.
Tobias okwa ti yee ko-VTC okwa yako mo2020 note lilongele oikwaminimo domeva. Eshi she mu fininika vati osheshi ina hala okuya keumbo ngaashi a dile ko - omunhu mwii ile mutilifi - ashike okwa hala a ka kale e na oshilonga moshiwana.
“Onda hala ndi shune mo ongomunhu a lundulula, e na eifano oshoyo elalakano ame ndi dule yoo oku ka vatela meme nokaana kange a ka nda fiile ke na eedula nhano ashike paife oke na eedula o28,” Tobias ta tumbula.
Okwa twikila yoo kutya okukala u li mokakuma uhe na eshi to ningi, natango ohashi etele omunhu omadiladilo mahapu, noshe mu fininika e ke lishangife kofikola youngoba. “Ame mwene modolongo onda ya mo ndi na eedula dinini lela ashike kanda li ndi na vali ediladilo ngeenge ohandi dulu okuninga sha shaashi eedula dange dehandukilo oda li dihapu. Konima eshi nda tameka o-VTC onda ka shiiva meendelelo, nonda ka tameka handi pangele keshe epoto lokandjuwo ile omunino wa topa modolongo, naikwao ihapu. Eshi osha eta nge pomhito yakula ndi uye ndi ulike oshitalendi shange momafiyafano, handi kalele po eedolongo adishe moshilongo moPlumbing.
Tobias okwa ti ekalo laye modolongo inali mu ninga ashike omunhu mupe ndele ole mu pa yoo omaifano a yooloka, ta ti kakele koplumbing, okwe lihongela yoo outheology, hano oku li omufita.
Patrick Gariseb omunamido 48 okwa ti yee ote lilongo a ninge oindjiniya yokupangela eehauto. Okwa ti yee eshi a pewa ehandukilo leedula o10, oshe mu undula a kufe eifano lonhumba.
Gariseb okwa ti eifano okwa tameka okulihonga mo2020.
“Kasha li shipu okutambula ko ehandukilo leedula adishe odo, ame kanda li yoo nda teelela ndi mone omhito yokulihongela sha vali shaashi modolongo onda ya mo ndi na eedula dihapu lela,” Gariseb ta ti.
Okwa twikila kutya paife okwa pyokoka mokupangela eehauto, noha pangele eetuwa depangelo pefimbo e li modolongo. Okwa ti yoo eshi ohashi vatele epangelo liha longife oimaliwa ihapu ngeenge tashi ya pokupangela eehauto.
Gariseb okwa hokolola kutya yee ukuudite unene etumba eshi ta di modolongo neifano louindjiniya. Okwa ti yoo natango okwa teelela a ka djale enguwo laye momwedi tau uya moTransport and Logistics ko-NUST.
Okwa kumaida ovanadolongo vakwao ava tave lihongele omaifano a yooloka vaha sholole, ndele va twikile nokulihonga nande ve li monghalo idjuu.