OMHEDI - Ohamba yOvakwanyama Martha Kristian Mwadinomho Nelumbu okwa kumaida ovanafikola ve lihonge noudiinini momakonakono avo axuninwa.

Edi Nelumbu okwe di popya onghela pefimbo kwa li ta popi novafikola va dja keefikola ngaashi Sakaria Shikudule Combined School noshoyo Ever Star Private School eshi va talela po kouhamba. 

Ohamba oya ti ovanafikola ovo ovaleli vokomongula onghee osha fimana opo ve litule mo moilongwa.

“Dulikeni kovahongifikola veni. Kaleni kokule noikolwifa noingangamwifi molwaashi otai piyaaneke elihongo leni,” Nelumbu ta ti.

Okwa weda po ta ti eefikolo adishe oda manguluka okukala da talela po kouhamba opo ounona va kale ve shi ohamba yavo.

Nelumbu okwa pandula ovahongifikola kofikola Sakaria Shikudule Combined School eshi va fimaneke omufyuululwakalo mokweeta ovanafikola kouhamba.

“Onda hafa eshi nda shakeneka oshiwana shange. Onda fimaneka eholekepo leni ovanafikola amushe,” ta ti.

Lopokati opo, mwene womukunda Omhedi A, Vilho Shimuoshili okwa ti osha fimana ngeenge ovanafikola tava talele po eumbo kouhamba kOukwanyana noshoyo okushiiva ohamba.

“Ovanafikola  fimanekeni omufyuululwakalo weni noshoyo mu shiiive ovaleli veni vopomufyuululwakalo,” ta ti.

Paulus Shilongo ha fikola koSakaria Shikudule Combined School  e li mondodo 11,  okwa ti opo lwotete ta ende kouhamba noshoyo okushakeneka ohamba lwotete.

Antonia Hafeni e li mondodo 10, okwa ti okwa hafa okushakene omalenga elelo laUkwanyama molwaashi kakwa li e a shi.

“Osha fimana opo tu kale tu shi ovaleli vetu vopamufyuululwakalo,”  Hafeni ta ti.

fhamalwa@nepc.com.na