Okakadona keedula 18 oke limangelekela koshi yomuti efimbo longula momukunda Okauva moshitukulwa shaHangwena.

Nakufya okwa tongololwa oye Victoria Fillemon omunafikola pofikola Oshikunde Combined School e li mondodo 12.

Umwe womukwapata waFillemon, Lovisa Naundapa okwa hokolola ta ti nakufya okwa kala ta nyenyeta oshivike sha dja ko ina hala okuya kofikola molwaashi vati ha pewa oshimaliwa shishona.

“Okwe tu lombwela kutya ita tameke ofikola shaashi ina pewa oshimaliwa sha wana oku ka landa oinima yaye. Okudja opo okwa kala e li meumbo ashike ina kala ta ulike e na omadidiliko okulimangeleka,” ta hokolola.

Okwa weda po ta ti ova pula Fillemon kutya okwa hala okupewa ingapi ashike okwa kala ta yolo.

Okwa koleka ta ti nakufya okwa fiya omukanda tau yandje ouyelele kombinga yefyo laye ashike ovakwapata inava lesha mo molwaashi owa kufwa po kopolifi.

Omukulunhu koshikondo shopolifi shokukonakona oimbuluma omupedukomufala Zachariah Amakali okwa anya okuyandja ouyelele kovatoolinghunda kombinga yaashi sha shangwa momukanda wa fiya po kuFillemon.

Onghee Amakali okwa ti opolifi oye lipyakidila nokuninga omakonakono kombinga youyelele ul i momukanda.

Oshiningwanima shikwao, okamatyona keedula 19 nako oke limangelekela koshi yomuti nodalate momukunda Oshihau moshitukulwa shaMusati.

Nakufya okwa tongololwa oye Show Senale omunafikola kofikola Iilyateko Combined School e li mondodo 10.

Opolifi oya hokolola tai ti Senale vati okwa vaka ombelela mofitola nokonima eshi a pulwa kumwene wofitola okwa faduka po nokulimangeleka.

fhamalwa@nepc.com.na