TSUMEB - Ovanailonga 23 hava longo komina yoDundee moTsumeb okwa li va tambulilwa moshipangelo shaTsumeb konima eshi vati va nwa otee ya ningwa nomeva a fulukifwa mokamaikoloweiva.
Oshiningwanima eshi osha ningwa oshivike sha dja ko pefimbo loilonga.
Omukulunhuwiliki wouhaku moshitukulwa shaShikoto, Joshua Nghipangelwa okwa holeka ta ti ovanailonga ova tameka tava kungu nokuvela momadimo, vo ve na oshimela.
“Okudja opo ova twalwa koshipangelo diva opo va mone epango lopaunamiti,” ta ti.
Nghipangelwa okwa ti osha nyika oshiponga ngeenge omunhu ta nu oteye ya ningwa nomeva a fulukifwa mokamaikoloweiva.
Onghee okwa kumaida oshiwana opo shi kale tashi ningi oteye nomeva a fulukifwa momakopi okolusheno ile meembiya.
Eshi a kwatafana naKundana omupopiliko womina yoDundee Alina Garises okwa ti ovanailonga ova alukila koilonga Etivali konima eshi va lekelwa moshipangelo.
Okwa ti omina yavo oi na oshikondo shouhaku hashi yandje ouyelele nehongo kovanailonga nghee ve na okukaleka po oukoshoki noshoyo okukala ve li momudingonoko wa yela.
“Otwa ningila omeva hatu longifa koilonga omakonakono opaunamiti opo a talike ngeenge oku na udiyo, onghee fiyo opapa otwa teelela omakonakono oidjemo yomeva,” ta ti.
Okwa weda po ta ti omina yavo otai twikile nokuyandja omeva okunwa kovanailonga molwaashi osha fimana ngeenge ovanailonga tava nu omeva.
fhamalwa@nepc.com.na