Lüderitz –Ovanailonga mombaanga yoFirst National Bank moLüderitz, Omaandaha oshivike eshi ova yandja omaano oshimaliwa N$1060 kehangano loPebble Foundation, moshitayi shaLüderitz. Oshimaliwa osha yandjwa nelalakano oku ka landa eemhumbwe dounona voukadona ovo ve li meefikola.
Omunailonga mombaanga yoFNB moshitayi shaLüderitz Bianca Naibed oye a yandja oshimaliwa eshi keemuma, e shi pa oilyo yehangano loPebble Foundation moshitayi shaLüderitz, i ka vatele moshikefa shokukwafela ounona voukadona, va kale va vatelwa mokuhavalekwa eemhumbwe odo hava pumbwa omwedi keshe, oshoyo eemhumbwe defiku keshe.
Mokutambula ko omaano oshimaliwa eshi, omukwateli komesho wehangano lo PEBBLE Foundation moLüderitz Crystal Jantjies , okwa pandula ko vanailonga moFirst National Bank moLüderitz, eshi velimanga kumwe nokuyandja omaano oshimaliwa osho tashi ka landa, eemhumbwe dounona voukadona ovo ve li momhumbwe meefikola moshilongo.
Jantjies okwa tumbula kutya, omaano oludi eli okuli oo otete, apewa oshikefa eshi sho PERBBLE Foundation, odula yoneudo 2019, nokwa udaneka kutya oshimaliwa osho ehangano la pewa ko va nailonga vo FNB ota shi kalongifwa mokulanda eemhumbwe dounona voukadona ovo veli momhumbwe meefikola, ongaashi osho shi li elalakano lehangano lo PEBBLE Foundation.
Okwa fatulula kutya ehangano loPebble kali fi lokulikola , noli na oilyo yovaliyambi moshilongo ashishe. Jantjies okwa tumbula kutya ove na oilyo meedoolopa da yooloka moshilongo, oyo hayi ningi oikonga yokuudifa ko oshiwana omalalakano ehangano, opo va dule okumona omavatelo .
Okwa tumbula kutya odula ya ya ehangano loPebble Foundation ole shi pondola okutopolela ounona voukadona oiyakulifo oyo hava pumbwa okulongifa omwedi keshe yongushu yee N$50 000 meefikola da yooloka moshilongo. Nokwe lineekela kutya odula yoneudo, otava kwafela ounona voukadona vahapu vedule ovo va vatela odula yaya.
Jantjies okwa tumbula kutya momukokomoko woikonga yehangano loPebble odula yaya ova didilika kutya ope na ounona voukadona vamwe hava i kofikola vehe na nande oiyakulifo, oyo hava pumbwa okulongifa omwedi keshe. Okwa tumbula kutya, omapekaapeko oo a ningwa okwa ulika kutya, ounona voukadona ovo ve li momhumbwe, ngeenge ova kala nokuhavalekwa oipumbiwa oyo, nena otashi va pe va kale va manguluka, osho tashi eta ve lihonge nelitulemo. Jantjies okwa pandula ovanilonga vomo FNB eshi tava twikile okuyambidida ehangano lo Pebble Foundation, eshi odula yaya, ombaanga yo FNB ya havalekele oiyakulifo kounona voukadona kofikola koGobabis Combined nodula yoneudo ova yandja oshimaliwa shi ka lande oiyakulifo, i dule okukahavalekwa ounona voukadona ovo ve li momhumbwe meefikola da yooloka moshilongo.