ONGWEDIVA - Minista wouhaku nomayakulo opashiwana Dr. Kalumbi Shangula okwa ti omwaalu wovanhu tava kwatwa kumalaria otau ende wa uka pombada unene pefimbo e li lodula i li metifa.

Okwa yelifa ta ti neudo omwa lopotwa ovanhu 2 476 va kwatwa kumalaria mwa kwatelwa ovanhu 292 ve li moipangelo.

Okwa ti ovanhu 10 ova lopotwa neudo va xulifa konima eshi va kwatwa kumalaria. Okwa yelifa ta ti oipangelo 16 oyo ya lopota malaria oyo Eenhana, Okongo, Engela, Onandjokwe, Omuthiya, Tsumeb, Oshakati, Oshikuku, Outapi, Rundu, Andara, Nyangana, Nkurenkuru, Ncamagor, Opuwo noshoyo Katima Mulilo. Okwa kumaida oshiwana opo shi liufe komilandu dokukelela malaria noshoyo okulopota pefimbo ovanhu tava ulike omadidiliko amalaria.

Onghee okwa ti osha fimana ngeenge omunhu a kwatwa kumalaria ile ta ulike omadidiliko ta lopotwa pefimbo opo a dule okupewa omayakulo opaunamiti.

“Oshiwana nashi longele kumwe novanambelewa vouministeli wouhaku, ovananhu nava topolelafane ouyelele nehongo momikunda kombinga yamalaria,” ta ti.  Shangula okwa ti ouministeli wouhaku onghee tau twikile nokuyandjaneke eenete dokukelela eemwe noshoyo oprogalama yokupombela momaumbo.

“Oshiwana nashi longele kumwe novanailonga vopombela molwaashi osha fimana ngeenge momaumbo tamu twimikilwa opo ku kelelwe etandavelo lomalaria,” ta ti.

-fhamalwa@nepc.com.na