Elelo lodoolopa yEenhana ola yandja oilonga yopokafimbo kovakalimo opo va kale tava wapaleke odoolopa.
Omupopiliko wodoolopa yEenhana Ottilie Shingenge okwa ti ovanhu ova tameka nale okuwapeleka odoolopa.
Okwa ti elalakano okukaleka po odoolopa tai monika nawa yo oya yela shaashi otashi ulike efano liwa. “Osha fimana ngeenge odoolopa yetu ya yela shaashi oukoshoki owa fimana efimbo keshe,” ta ti.
Shingenge okwa hokolola ta ti muni wEenhana ota lalakanene yoo vali okuyandja eemhito doilonga yopokafimbo kovanhu ve li momhumbwe yoilonga.
Okwa ti muni wEenhana ota shakeneke epangelo ondjilakati tashi pitile mokuyandja oilonga yopokafimbo koshiwana.
Okwa weda po ta ti elalakano okulwifa ondjala noluhepo.
“Oilonga ei yopokafimbo otai yandje omhito kovanhu va dule okulanda noikulya momaumbo noshoyo okuyambidida omaludalo avo shaashi otava mono ondjabi,” ta ti.
Okwa ti ovanhu ova topolwa meengudu dokuwapaleka momafiku a yooloka.