ONGWEDIVA - Hamushanga wehangano lovapangi loNamibia Nurses Union, Junias Shilunga okwa ti ovapangi nava xulife po okulonga eevili da pitilila noshoyo okulonga momaxuliloshivike molwaashi ihava futwa eevili doluteima.
Edi Shilunga okwe di popya Etitatu pefimbo a ya momutumba novapangi mOtjiwarongo.
Okwa ti kashi li pauyuuki eshi ovapangi tava longo eevili da pitilila ashike ihava futwa oshimaliwa sholuteima.
Etivali loshivike eshi, ovapangi kokapangelo kaNdangwa ova yandja enyenyeto lavo koilyo yeumbo lomutumba wopashiwana tava ti ova pitikwa ashike okufutwa eevili mbali doluteima.
“Nonande natu longe eevili nhano doluteima, ihadi futwa. Okapangelo ohaka kala ke hadi ovanaudu ashike ihava pu okupangwa pefimbo onghee ohatu longo fiyo eevili da pitilia,” omupangi ta lombwela oilyo yeumbo lomutumba wopashiwana.
Shilunga okwa ti ngeenge epangelo itali kandula po oshikumungu eshi, oukolele woshiwana otau kala u li moudjuu molwaashi itava kala vali tava pangwa momaxuliloshivike ngeenge tava vele.
“Epangelo nali fimaneke ovapangi ngaashi naanaa hali futu ovanailonga va yooloka oshimaliwa shomaluteima. Ovapangi ohava longo oshilonga sha fimana molwaashi ohava ungaunga novanhu ve na omikifi da yooloka,” ta ti.
Shilunga okwa ti oule weedula 10 epangelo ola dopa okuyandja omidjalo doilonga kovapangi.
“Ovapangi paife ohava longifa oshimaliwa shavo okulilandela omidjalo doilonga,” ta ti.
Okwa indila epangelo opo li tamake okufuta ovapangi eevili doluteima de lixw apo molwaashi otashi tu ovapangi omukumo opo va yakule ovanaudu nondjungu.
Omupangi koshipangelo shaNandjokwe okwa weda po ta ti otava tu kumwe naShilunga molwaashi ohava kala alushe va twetwenya shaashi ihava futwa eevili davo de lixwa po doluteima.
“Ngeenge ouministeli wouhaku itau kandula po omukundu ou nafye itatu kala vali hatu yakula ovanaudu konima yeevili odo twa ufwa okulonga,” ta ti.
Ovakwashiwana ova ti ngeenge ovapangi ova xulifa po okulonga momaxuliloshivike noshoyo eevili domaluteima otava kala moudjuu molwaashi itava ka pangwa vali.
Omukulupe weedula 76 okwa ti ovanhu ove hole okuya koupangelo momaxuliloshivike onghee paife ovanhu otava ka kala ashike ve li momaumbo tava vele shaashi kape na ovapangi.
“Epangelo nali kandule po oshikumungu eshi, ovapangi ova fimana shaashi ovo ve kwetele po oundjolowele wetu,” ta ti.
Okwa weda po ta ti itashi ulike efano liwa omupangi ta fiye ovanaudu ve li momukweyo omanga ta i keumbo.
Omukwashiwana umwe okwa weda po ta ti ovanhu ohava vele efimbo keshe omanga ovanhu vamwe ove na omaudu a pumbwa okupangwa diva onghee okwa ti osha fimana opo ovapangi va longe nomomaxuliloshivike ile eevili da pitilila.
fhamalwa@nepc.com.na
Caption: Inamu longa vali oluteima…Junias Shilunga, hamushanga wehangano lovapangi moNamibia ke udite ombili eshi ovapangi tava longo eevili da pitilila.
Efano: Otwe li pewa