OSHAKATI - Omukulunhu wopolifi moshitukulwa shaShana Commissioner Naftal Sakaria okwa yelaela ovanambelewa vopolifi veli 42 neenghatu da yooloka oshivike sha djako.
Mokati kovapolifi omwa kwatelewa ovakainhu 19, ovapolifi vatanho ova pewa ondodo youchief inspector, va hamhano ova ninga eesenior inspector omanga 31 ova ninga eeinspector.
Mokati kovapolifi va pewa eembadi omwa kwatelwa yoo vali omupopiliko wopolifi moshitukulwa shaShana Thomas Aiyambo ou a yelaelwa nonghatu youchief inspector.
Moshipopiwa shaye Sakaria okwa kumaida ovapolifi va pewa eembadi opo va twikile nokulonga nondjungu nokulwifa oimbuluma moshitukuluwa.
“Twikileni okulongela kumwe novakwashina okukandeka oimbuluma nokuyandja omayakulo koshiwana ngeenge tashi kongo omayakulo opolifi koitaashi,” ta ti.
Okwa ti omunhu ngeenge ota longo oshilonga shiwa moshiwana natumbalekwe moilonga yaye.
“Ovapolifi ohava longo nondjungu okukaleka po eameno lovanhu moshilongo nokukandeka oimbuluma,” ta ti.
Onghee okwa ti elalakano lokuyelaela ovapolifi okuvatwa omukumo nokuvaxwaxwameka va twikile okulonga nondjungu fiyo tava ka pewa vali eenghatu da landula ko.
Lwopokati opo, Chief Inspector Aiyambo okwa ti okwa pandula eshi a pewa ombadi youchief inspector, onghee ota twikile okulonga nondjungu nokuyakula nawa oshiwana ngeenge tashi kongo omayakulo opolifi.
“Ohandi twikile okuyandja ouyelele nehongo koshiwana molwashi osha fimana ngeenge oshiwana tashi pewa ouyelele kombinga yoimbuluma noshoyo ehongo,” ta ti.