RUNDU – Omupresidente wongudu yopapolitika yoPopular Democratic Movement McHenry Venaani okwa ti ongudu yavo otai ka yandja ehongo nouyelele koshiwana opo shiha ninge vali oihakanwa yokudipawa keengadu.
Okwa ti ovanhu omuwoi ova lopotwa va dipawa keengadu omudo wa dja ko pefimbo kwa li tava kendabala okuteka omeva momilonga.
Edi Venaani okwe di popya pefimbo loshikonga shomahoololo sha li koRundu mexuliloshivike.
Eengudu dopapolitika ode lipyakidila nokuninga oikonga yomahoololo koitukulwa ya yooloka tadi xwaxwameke oshiwana di kale da hoololwa nokufindana.
Venaani okwa ti ongudu yo-PDM otai ke lihanena momikunda di li moitukulwa ngaashi Zambezi, Kavango West noKavango East mokuyandjaneka ouyelele moshiwana.
Venaani okwa ti yoo vali PDM ota ka kandula po omhumbwe yomeva momikunda nokukwashilipaleka kutya oshiwana otashi nu omeva a yela.
Onghee okwa ti osha fimana ngeenge oshiwana shi na omayakulo ngaashi oipangelo, eefikola nosho tuu omayakulo a yooloka.
“PDM ota ka kandula po yoo vali onghalo yokuhe na oilonga movanyasha, onghee ohatu kwashipaleke kutya ovanyasha ova pewa omikuli dokutameka eengeshefa davo noinyangadalwa younamapya,” ta ti.
Pefimbo ta popi noshiwana, Venaani okwa ti PDM oku li omhinge noulingilingi tau longwa kovaleli vopapolitika unene tuu ovo ve li moshikumungu shoFish Rot.
“Otu na omwaalu muhapu wovanhu va kanifa oilonga hava longele kwa li omahangano eeshi koWalvis Bay sha etwa koulingilingi,” Venaani ta ti.
Onghee okwa ti PDM ngeenge okwa findana omahoololo omomudo tau ya kape na oulingilingi tau longwa moNamibia.