ONGWEDIVA-Sho aanafalama ya kala ya taalela uupyakandhi omolwa omuloka inaagu gwana omumvo gwayi, omitima ngashingeyi odha galulilwa etegelelo ewanawa sho shiyanga yayi ulike omandhindiliko omawanawa.
Omata gotango gomvula ngoka ga loko komatango gEtitatu mOkongo koshitopolwa shaHangwena, oga eta omukumo maanafalama yomomapya oshowo yiimuna, mboka ya li yena eyikwato pomutima kutya, no nuumvo ka kuna omoloka omwaanawa, omolwa onkalo yombepo ndyoka hayi lunduluka ethimbo kehe.
Ngaashi sha kala sha shiwika nawa, omvula ohayi temuna pokati kaSeptemba naKotomba.
Okwa konekwa kutya uuna omvula ya temuna,noondima odha fumako.
Uuna omvula ya temuna, ohaku kala omandhindhiliko ngaashi, omiti tandhi ya gumuka.
Omiti dhimwe ngaashi omigongo ohadhi tameke okutenda nohadhi eta omafo omape, noko nima ayihe mbyoka ya holoka, omiti odhindji ohadhi tameke okuziza nomutenya ohagu tameke nduno okufika noonkondo.
Oyendji konima shampa omvula ya temuna, ohaya tameke okuwowola omapya gawo e tayi ilongekidhile ethimbo lyoondima. Aanegumbo oyendji unene tuu yokomikunda ohaya hupu muunamapya.
Ethimbo ndika ohaya tula iilongitho yawo pomahala.
Omatemo ohaga longekidhwa nawa nokutulwa komipini, opo sho tayi ke ga dhenga pevi, oondima nandho dhayi miilonga. Kundana sho ayi moonkundathana naanafalama yamwe, oyendji otaya ulike ye na omukumo omanga yamwe ya pandula nokuligolela omata gotango. Iikogo oya ningi esiku tayi gandja omukumo, ihe okupendukila Etitatu omata okwa li ga idhenge pevi.
Nonando omvula ka kwa li oyindji ngaashi aanafalama ya li ya inekela, oya talameka omeya, ngoka ga pwiinine mbala omolwa enota lyevi.
Kansela goshikandjohogololo, shOkongo Libeus Efraim Shipindo moonkundatha naKundana okwa ti, omadhiilaadhilo guumbanda okukanitha iimuna yawo omolwondjala otaga ende taga kana, omolwomoloka gwotango.
“Omata ngoka otaga ulike kutya otwa tegelela omvula oyindji. Omvula itayi vulu okuloka ashike lumwe ee tayi mwena. Ondi inekela kutya otatu ningi aanelago, moomwendhi tandhi keya ndhoomuloka” ta popi ngaaka.
Shipindo ta ti, ngele omvula oya ka loka pethimbo lyayo, omwiidhi nago otagu ka kala gwa tsapuka nawa, ku yele, niimuna ya taalela ondjala otayi ka hupa.
Hilma Shikoyeni gokOkongo okwa ti, omvula ndyoka ya loko oya eta omukumo maanafalama yomo mapya.
Ta ti, oya tegelela ashike ku ze natango omata gamwe petameko lyaDesemba, opo ya longekidhe oombuto dhiilya yawo.
“Ondina omukumo kutya momvula ta yiya, ita ka taalela omaupyakandhi ngaashi go nuumvo, ga etwa ke koloto lyomvula,” ta popi ngaaka.
Silas Thomas okwa ti, oya uvu nawa komvula sho yaloko mondoolopa yawo, oshoka oya talalelwa nawa.
“Otatu pandula komuloka omwaanawa, nonando hago lela gwa pumbiwa kaanafaalama, omwaanawa nomondoolopa,” ta pandula.
Aanafalama yomomapya mboka ka kwali ya likola mo sha momapya gawo oya ti, oya tegelela omoloka gwalandulako opo ya pulule omapya gawo.
Caption: Shiyenga shaNangobe… Omvula ya temuna
Efano ota li ulike ashike